الخميس، 30 يوليو، 2009

عريس "لوكتة" ولا أجمل ولا أروع ولا أحسن



احترت حقيقة في التعريف الدقيق واللغوي والصحيح لمعنى كلمة "عريس"..فهل العريس ده هو البني آدم اللي ممكن يشوفني "شكلاً" أعجبه يقوم يقول هي دي ويسأل عني عشان ييجي يزورنا خبط لزق ما انا شكلي عجبه؟! ولا هو البني آدم برضو اللي بيبعتلي حد يجس نبضي ويعرف اذا كنت مرتبطة ولا لأ عشان لو كدة يخلع من برة برة؟! ولا هو البني آدم اللي معرفوش أصلا بس واحدة قريبتي تقولي عليه ده لقطة محترم وأخلاق وكويس ولايقلك قوي مستخسراه في غيرك أكلم أهله عليكِ وأرشحك ليهم يمكن يحصل نصيب؟!! ولا هو البني شخص اللي بيرسم عليا دور اللي بيحبني بس لازم نعرف بعض أكتر يعني نخرج سوا ونتفسوح شوية كدة ونعيشلنا يومين قبل ما يروح لأهلي؟! ولا هو البني شاب اللي بيطلب يرتبط بيا في الجامعة اذ ربما نكمل بعد الجامعة ونتجوز؟!ولا هو الحد الجد المحترم اللي يعاكسني عالموبايل ولما أهزأه مرة واحدة واسيبه بعد كدة يرن يقوم باعتلي رسايل وبعدين يتصل من رقم تاني يقولي اني انسانة محترمه ومفيش مني عشان كدة هو قرر يرتبط بيا ومفيهاش حاجة لو شفته مرة عشان اقول رأيي لأنه حبني فعلا وهيرتبط بيا حتى لو كنت أكبر منه بسنتين؟؟!! ولا هو البني سخص اللي يكلمني مرة واحدة بس عالنت يقوم يعجب بشخصيتي وكلامي وووووو..إلخ فيطلب يشوف صورتي ورقم موبايلي عشان نتعرف أكتر عشان هو بيدور على عروسة دماغها زي دماغي وشخصيتها قريبة مني وده بقى بيبقى أنواع كتير..اللي مسافر برة مصر ومتخيل ان مينفعش أقوله لأ مبحبش اتعرف على حد لأنه لقطة"من وجهة نظره" ونوع تاني مبيحبش جواز الصالونات وبيقلك أنا دغري ومبحبش اللف والدوران صحيح دي أول مرة نتكلم بس انت عجبتيني مفضلش غير اشوف صورتك واسمع صوتك وياسلام لو نتقابل عالأقل مرة عشان آجي أخطبك انا مهندس وشغال في شركة بترول بس مش فاضي أدور على عروسة ومش عايز واحدة متخلفة ودماغها تعبانة؟!! ولا هو قريبك اللي شايف انه يعرفك كويس وشايف انك كويسة وتستاهلي يتكرم عليك ويشيلك اسمه وبعد ما هو لف ودار كتيييير لقى ان اللي يعرفه أحسن من اللي ميعرفوش وزيتنا يبقى في دقيقنا وخلاص بقى بدل ما تعنسي...؟؟!!!
دي بعض الأشكال اللي ممكن تصادفنا مش كلها..طبعا مناسبة الكلام ده هي العريس "اللوكتة" اللي جالي وخلاني قررت أكتب عنه بوست مع اني مش بحب اكتب عن هم الحب والارتباط والجواز والعرسان لأن الصمت أحيانا بيبقى أبلغ من الكلام.
معرفش ليه افتكرت صاحبتي في الجامعة اللي اتخطبت لواحد قريبها من بعييييييييد ما اتكلموش ولا مرة حتى وهو مسافر برة مصر جم اهله خطبوها وهو مسافر واشترولها الدبلة ولبسوهالها لحد ما ييجي ويقعدوا مع بعض وده لأنها بيجيلها عرسان كتير وهو خايف لتطير..أنا طبعا كنت بقولها انت كدة مش مخطوبة انت محجوزة...
وافتكرت كمان واحدة تانية كانت زميلتي في دار المغتربات لما حكيتلي انها اتجوزت بنفس الطريقة تقريبا يعني اتخطبت سنتين لصوت بتكلمه في التليفون وقبل الفرح باسبوع جه من السفر واتجوزوا وقعد شهر تقريبا أو أقل وسافر تاني وهي طبعا بقت حامل ولحد ما كنت معاها كانت في الشهر التاسع وجوزها مش هيشوفها ولا هيشوف بنته الا بعد سنتين تقريبا وكل الفرق انها سابت بيت أهلها وبتخدم في بيت أهل الراجل اللي جه قعد معاها شهر وسافر
أنا كنت ناوية أكتب بوست كوميدي بس معرفش ليه قلبت معايا نكد كدة؟؟ ما علينا سيبكم من كل ده واسمعوا حكاية العريس اللوكتة اللي جالي....
من يومين كنت في فرح اخت صاحبتي لقيت صاحبتي بتقولي في الفرح عندي ليك خبر حلو هقولك عليه بعدين..ولأني كنت في فرح صاحبتي دي من كام شهر بس وغالبا المعازيم هم هما ولأن كلمة خبر حلو في فرح ليها مغزى فهمت قصدها وقعدت بيني وبين نفسي أحضر نفسي للي هقولهولها لما أعرف الخبر الحلو ياترى هقولها اني مبحبش فكرة الجواز بالطريقة دي واحد عجبه شكل واحدة وميعرفش مضمونها ولا شخصيتها عاملة ازاي قام قال أشوفها, ولا أصبر واهدى كدة واقولها ربنا يسهل..قلت أركز في تصوير العروسة احسن وفكني من اللي قالته والحمد لله اني لما بروح فرح لا بلبس لينسز ولا نضارة وانا نظري بعافية فبرتاح من احساس ان في حد بيبصلي وبريح نفسي من اني آخد بالي من أي حد..بس وعدى اليوم
ولقيت صاحبتي وهي بتوصلني بعربية جوزها بتقولي جايلك عريس وغني قوي (الكلمة اللي مبحبهاش عشان بتحسسني اني بضاعة) لقيت أختي بتضغط عليا عشان أسكت ومردش الا لما أسمع للآخر..و لقيت صاحبتي بتقولي: بصي ياستي هو فلسطيني (اذبهليت وسبتها تكمل) عايش في ليبيا (كمان وسبتها تكمل وانا ساكتة) هيبعتلك تذاكر انت واللي تختاريهم من أهلك عشان تروحوا تشوفوه وتقرروا (مش هوصفلكم تعبيرات وشي ساعتها,قلتلكم ان طبعا ساعات الصمت بيكون أبلغ من الكلام) لو معجبكيش مش مشكلة هترجعوا تاني واهو اسمكم اتفسحتوا(أظن مفيش كلام ممكن يتقال) ها ايه رأيك؟ ..تفتكروا ايه اول كلمة ممكن تطلع مني بعد اللي سمعته؟؟(ايوة هي دي بس أنا مقلتهاش عشان انا مبحبش اتلفظ بألفاظ وحشة) أول حاجة سألتها لصاحبتي بعباطة هي..هو مكانش في الفرح وشافني؟؟!! ردها: لأ ناس شافوكي وقالوله عليكي وشكروا فيكي...ولقيتها خدت بالها أخيرا من تعبيرات وشي واختي اللي بتكتم الضحك ومتابعة تعبيرات وشي برضو, قامت قالتلي: أنا لو منك أسافر أتفسح وأرجع اقول معجبنيش يعني هتخسري ايه..؟!! فكري وهستنى منك تليفون أعرف رأيك عشان أبلغه للناس...!!!
نزلت وأنا مذبهلة ومش بتكلم وأول ما دخلنا البيت أختي حبيبتي طلعت كل اللي كاتماه من ضحك وجريت على ماما والحقي بنتك جالها عريس لقطة محصلش
أمي حبيبتي بقى رد فعلها كان لذيذ برضو..قالتلي: انت صحيح مطلعة عيني وقارفاني ومغلباني ونفسي أخلص منك النهاردة قبل بكرة..بس مش لدرجة اني أرميكي ووضحتلي حاجة كمان..قالتلي: الفلسطيني اللي بيسافر برة واقامته تسقط بيبقى صعب أو مستحيل يرجع تاني مفهمتش قصدها قوي بس اللي فهمته ان اللي هتتتجوز الاخ ده مش هترجع بلدها تاني تقريبا...!!!!
أسئلة مهمة بقى...في واحدة ممكن فعلا توافق تتجوز بالطريقة دي؟؟ في أهل واحدة ممكن يوافقوا يعملوا في بنتهم كدة؟؟ايه اللي ممكن يخلي واحدة عاقلة تعمل في نفسها كدة وما حدش يقولي عنوسة والبنات مش لاقية والكلام البايخ ده؟؟ازاي أصلا حد يجيب لحد عرض زي ده وازاي يستنى منه موافقة؟؟تفتكروا ده يبقى اسمه عريس؟؟

الأربعاء، 29 يوليو، 2009

نجحت رسمي فهمي نظمي ...الحمد لله:)



نتيجتي ظهرت وطلعت عالنت كمان والحمد لله نجحت رسمي فهمي نظمي بفضل الله وطلعت الأولى على شعبتي صحيح بجيد بس وكان نفسي في تقدير أعلى
بس الحمد لله على كل حال :)
وأختى كمان اتخرجت من نفس الشعبة بتقدير جيد

الحمد والشكر لله :)
.
.
.
.
.
.
.
.
.
.
.
.
.
.



إستنوا البوست الجاي..أصل جالي عريس (لوكتة) مينفعش مكتبش عنه S:D:

الاثنين، 13 يوليو، 2009

حرية المرأة في مصر..زائفة..زائفة





يتحدث الكثيرون عن الحرية التي نادت بها المرأة ونالتها عنوة, والغالبية رافضين لهذه الحرية, وأسمع على لسان رجال أثناء سيري في الشارع كلمات تثير الغيظ من نوعية "ناقص إيه كمان معملتوهوش" و" فاضل إحنا اللي ننادي بحريتنا"و"مش كفاية عليكوا عربيتين في المترو", أتعجب كثيرا ممن يرفضون هذه الحرية التي لم أزل أبحث عنها؟!! فأين هي الحرية التي يتحدثون عنها ونحن- فتيات وسيدات- لازلنا نخشى السير بمفردنا في الشارع خشية المضايقات والتحرشات والتي...إضغط لقراءة الموضوع في مجلة رؤية مصرية

الأحد، 5 يوليو، 2009

لحد إمتى هيفضل المصري رخيص؟؟؟



مش عارفة ابدأ كلامي بإيه ولا أقول ايه بجد, لما تابعت قضية مروة الشربيني المصرية اللي اتقتلت في ألمانيا وبرود الألمان تجاه الموضوع حسيت قد ايه احنا رخاص طبعا احنا رخاص جوة من زمان وده خلانا رخاص برة كمان مروة ماتت عشان عربية مصرية مسلمة محجبة على ايد متطرف ألماني وبسكين واكتر من عشر طعنات وجوزها لما جه يحميها طعنه المتطرف تخيلوا محكمة يحصل فيها كل ده والقاضي والناس كلها بيتفرجوا محدش فكر يتدخل عشان ينقذ المسكينة دي من ايد الالماني الارهابي أيوة ارهابي هو ده الارهاب بجد , ولما حب ظابط يتدخل أطلق النار على اللي مش الماني شفتوا الحلاوة لما جه يفض الاشتباك بعد ما روح مروة فاضت ضربوا الغريب مش الجاني اللي كمان متكتمين اسمه..والأدهى ان الاعلام هناك تجاهل الخبر طبعا ماهي عربية مصرية ومسلمة وكمان محجبة يهتموا ليه يعني؟؟
تفتكروا حق مروة هيرجع؟؟حق ابنها اللي شاف امه بتموت وابوه بيضرب قدام عينيه وهو لسة طفل هيرجع؟؟ حق جوزها اللي ضربوه بالرصاص هيرجع؟؟ لحد امتى هيفضل المصري رخيص في بلده وبراها؟؟ تفتكروا لو عكسنا الوضع واللي ماتت ألمانية على ايد مصري وبالصدفة حكومتنا كانت هتسكت؟؟ الألمان كانوا هيسكتوا؟؟ لحد امتى هنفضل رخاص قوي كدة؟؟

البنت المصرية اللي قضيتها تشبه لحد كبير قضية سوزان تميم واللي قتلها الاماراتي في مصر والحكومة المصرية رفضت نشر صورته..تفتكروا أهلها هياخدوا حقها..شفتوا الفرق بين القضيتين واحدة نامت لأن بطلتها مصرية والتانية لأن بطلتها مش مصرية ....

وآدي خبر كمان:

شرطي أمريكي يقتل شاباً عربياً ويعود إلى الخدمة ليردي شخصاً آخر


بجد بأسف على حالنا وبأسف على اللي احنا فيه وبرضو بسأل لإمتى هنفضل رخاص قوي كدة؟؟؟