الأحد، 5 يوليو 2009

لحد إمتى هيفضل المصري رخيص؟؟؟



مش عارفة ابدأ كلامي بإيه ولا أقول ايه بجد, لما تابعت قضية مروة الشربيني المصرية اللي اتقتلت في ألمانيا وبرود الألمان تجاه الموضوع حسيت قد ايه احنا رخاص طبعا احنا رخاص جوة من زمان وده خلانا رخاص برة كمان مروة ماتت عشان عربية مصرية مسلمة محجبة على ايد متطرف ألماني وبسكين واكتر من عشر طعنات وجوزها لما جه يحميها طعنه المتطرف تخيلوا محكمة يحصل فيها كل ده والقاضي والناس كلها بيتفرجوا محدش فكر يتدخل عشان ينقذ المسكينة دي من ايد الالماني الارهابي أيوة ارهابي هو ده الارهاب بجد , ولما حب ظابط يتدخل أطلق النار على اللي مش الماني شفتوا الحلاوة لما جه يفض الاشتباك بعد ما روح مروة فاضت ضربوا الغريب مش الجاني اللي كمان متكتمين اسمه..والأدهى ان الاعلام هناك تجاهل الخبر طبعا ماهي عربية مصرية ومسلمة وكمان محجبة يهتموا ليه يعني؟؟
تفتكروا حق مروة هيرجع؟؟حق ابنها اللي شاف امه بتموت وابوه بيضرب قدام عينيه وهو لسة طفل هيرجع؟؟ حق جوزها اللي ضربوه بالرصاص هيرجع؟؟ لحد امتى هيفضل المصري رخيص في بلده وبراها؟؟ تفتكروا لو عكسنا الوضع واللي ماتت ألمانية على ايد مصري وبالصدفة حكومتنا كانت هتسكت؟؟ الألمان كانوا هيسكتوا؟؟ لحد امتى هنفضل رخاص قوي كدة؟؟

البنت المصرية اللي قضيتها تشبه لحد كبير قضية سوزان تميم واللي قتلها الاماراتي في مصر والحكومة المصرية رفضت نشر صورته..تفتكروا أهلها هياخدوا حقها..شفتوا الفرق بين القضيتين واحدة نامت لأن بطلتها مصرية والتانية لأن بطلتها مش مصرية ....

وآدي خبر كمان:

شرطي أمريكي يقتل شاباً عربياً ويعود إلى الخدمة ليردي شخصاً آخر


بجد بأسف على حالنا وبأسف على اللي احنا فيه وبرضو بسأل لإمتى هنفضل رخاص قوي كدة؟؟؟

هناك 4 تعليقات:

  1. ياااااااااااااااااااااااه
    ده الواحد دمه محروق بشكل
    والاهم اننا خايفين هنقدر نعمل حاجه ولامش هنعمل
    يارب ساعدنا

    ردحذف
  2. السلام عليكم
    ربنا يتغمدها برحمته
    ويدخلها فسيح جناته
    ويصبرها أهلها وزوجها وابنها

    ،،،
    ويحاسب كل متخاذل في أخذ حقها
    أو كل من ضيع حق لمسلم
    وينتقم أي حاكم خذل أي احد من محكوميه
    أو هضم حقه وهو يعلم أو لا يعلم
    ،،،
    ويعينا في الوقوف في وجه كل ظالم أو مغتصب لحق غيره
    ويرحمنا من كل رئيس لا ينظر الا تحت قدمه
    أو يكون شغله الشاغل الحفاظ علي كرسيه

    ردحذف
  3. hحنا مش رخاص احنا مسترخصين
    يعنى بنفوت فى حاجات علشان كده اعتبرونا ولا حاجه مع انك لو قريتى التاريخ هتعرفى المصرى ايه

    ردحذف
  4. عشان دى حرب على الإسلام فهيفضلوا يحاربونا

    ردحذف

يا ترى عيونك بتقول ايه؟؟؟