الجمعة، 4 سبتمبر 2009

زيارة معهد الأورام



إن شاء الله هنعمل زيارة لمعهد الأورام القديم ونحاول نقدم لهم مساعدة المعهد فيه 100 طفل فكرنا نجيب لهم حاجات تفيدهم هتكون عبارة عن شنطة مدرسية فيها أداوات مدرسية + نص كيلو عسل نحل لانه علاج ليهم + لعبتين + علبه عصيرهنتقابل عند معهد الاورام القديم يوم الاربع الساعه 4.30وندخل نوزع الحاجات اللي هتكون جاهزة معانا بالفعلالمشاركات مش شرط مادية ممكن تشاركوا معانا بالزيارة وتوزيع الشنط عالأطفالللي يحب يساهم مادياسعر الشنطة الواحدة 40جنيه بمحتوياتها وممكن بعد كدة نفطر سوا في أي مكان أو اللي حابب يروحهدفنا نعمل خير ونشوف بسمة على وشوش الأطفال _____________

اللي هييجي معانا يبلغنا هنا في الايفينت ويأكد انه جاي عالوول

الجمعة، 21 أغسطس 2009

رمضان جانا وفرحنا به..كل سنة وانتم طيبين

كل سنة واحنا طيبين وبرمضان فرحانين ومبسوطين وأعمالنا خير ومقبولين:)

كل سنة وكل الأمة الاسلامية بخير

المسحراتي :)


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

الفانوس


من زمان قوي محدش جابلي فانوس..نفسي في فانوس

السبت، 15 أغسطس 2009

3 حاجات مضايقاني دلوقت :(


فعلا دلوقت انا مضايقة جداااااااااااااااا بسبب 3 حاجات أول حاجة: كل سنة بنسى أعمل عيد ميلاد لعيوني السنة دي قررت ما أنساش وقلت أكيد هعملها ولو حفلة عالضيق وكالعادة النهاردة وانا ببص في التاريخ إكتشفت انه كان من كام يوم واني نسيت أعملها رغم انها الفترة دي شغالة معايا يعني..أسفة ليها بجد :( تاني حاجة: جالي تعليقين عالبوست اللي فات جيت اضغط نشر قمت بحركة غباء دوست رفض من غير ما ألحق أشوف من مين واتضايقت طبعا لأن الواحد مش كل يوم بيجيله تعليقات ..أسفة للي تعليقهم مش هيظهر :( تالت حاجة: حضرنا شنطنا أنا وأختي وجهزنا نفسنا للسفر عشان نخلص شوية ورق ليها في الجامعة وبعد ما وصلنا الموقف مالقيناش مكان يوحد ربنا في اي معاد مع اننا نازلين بدري ساعة الا ربع المعادين البدري كومبليت من الصبح..رحنا نشوف مرسيدس مالقيناش غير اتوبيس ما نستحملهوش ربع ساعة فما بالكم ب4 ساعات سفر معاه هيكونوا 6 ؟؟!! والنتيجة اننا مسافرناش ومش عارفين هنسافر امتى ولا ازاي وسطة هوجة المصيفين اللسي تقريبا سابوا البحر وأقاموا في الموقف :@

الاثنين، 10 أغسطس 2009

عن الحب وأشياء أخرى




مترادفات كتير قوي بتساوي كلمة حب
حب يعني ولاء..يعني إنتماء..يعني إحترام..يعني وفاء..يعني إخلاص..يعني تضحية,

الحب مش مجرد كلمة سهلة ممكن تتقال في أي وقت لأي حد

الحب أكبر من كونه كلمة..الحب معنى..الحب موقف..الحب إحساس..الحب تسامح



انك تحب يعني انك مستعد تضحي عشان اللي بتحبه
انك تحب يعني انك مش قادر تشوف غير اللي بتحبه
انك تحب يعني انك مؤمن بالانسان اللي بتحبه
انك تحب يعني انك قادر تسعد اللي بتحبه
انك تحب يعني انك قادر توصل لقلب اللي بتحبه
انك تحب يعني انك تكون فخور باللي بتحبه
انك تحب يعني انك تكون قادر تمسح دموع اللي بتحبه

معاني كتير بتشملها كلمة من حرفين...

كتير بتصادفنا أحاسيس ومشاعر بنفتكر إنها حب..بس الحب أكبر من أي معنى أو إحساس

المشاعر اللي تموت وتتنسي مع مرور الزمن غلط نسميها حب
المشاعر اللي بتدخل فيها الحيرة والشك غلط نسميها حب

الحب أنوع ودرجات..
حب الله
الحب في الله
حب الحياة
حب البلد
حب الناس
حب الأهل
حب الأصحاب
حب الارتباط


ناس كتير بتدور عالحب ومش لاقياه...
وناس مش مقتنعة ان في حاجة اسمها حب...
وناس شايفة الحب كذبة
وناس شايفاه ضعف
ناس بتعرف تحب وتوصل حبها للي بتحبه
وناس مش بتعرف تعبر عن حبها ومش بتقدر توصله للي بتحبه



تعالوا نتكلم في الحب
تعالوا نتكلم عن أنواع الحب
تعالوا نتكلم عن درجات الحب
تعالوا نتعلم إزاي نحترم بعض
تعالوا نتعلم إزاي نفهم بعض
تعالوا نتعلم إزاي نعامل بعض
تعالوا نتعلم إزاي نختلف وإزاي نتفق
تعالوا نتعلم إزاي نحب بعض

وتذكروا.."لا يوجد بشر على وجه الأرض لا يحب..فأسوأ من فينا يحب نفسه"

شاركونا على موقع الفيس بوك
في
عن الحب وأشياء أخرى

الخميس، 6 أغسطس 2009

أختي الصغيرة إتخرجت قبلي يا جدعان



أختي نجحت وخلصت دراسة كمان هي صحيح أصغر مني وكان المفروض انا أخلص الأول بس أنا مبسوطة جدا
أختي أصرت تعمل حفلة تخرج وتعزم كل الناس اللي نعرفها وكل صحباتها عجبتني قوي لما قالت أنا لازم أعمل وأعرف كل الناس ان ماما(ربنا يخليهالنا) تعبها معانا السنين اللي فاتت مراحش عالفاضي..ماما كانت معترضة طبعا أولا لأن مالهاش في الهيصة والدوشة, ثانيا لأنها هتتعب جامد عشان احنا من صغرنا مش بنشتري حلويات من برة وماما موجودة يعني هي اللي هتعمل كل حاجة بنفسها وقد كان وشرفتنا كالعادة...أنا بقى كان رأيي ان بدل ما كل شوية حد يكلمنا يقول أحنا جايين نزوركم ونبارك (عشان تخرد اختي) وماما تقوم تعمل حاجة حلوة للضيوف يتجمع التعب كله في يوم ونفرح فيه ونفرح أختي وأصحابها...
إمبارح عملنالها حفلة تخرج صغيرة في البيت بجد كانت أكتر من تحفة وناس كتييييييييييييييييييييييييييييييييير جدا جد وبنات كتيييييييييييييييييييييير عكس ما توقعت لأني كنت فاكرة ان سنين الكلية برة العريش ضيعت مننا صداقات زمان خلاص..بس إكتشفت ن على قد ما بتاخد مننا صداقات على قد ما بتدينا الصداقات الحقيقية والقوية وان شاء الله هعمل بوست عن الموضوع ده
المهم ان برغم ان كلنا تعبنا جدااااااااااااااا ماما وانا وأختي وصحباتنا وقرايبنا الا ان الكل كان مبسوط وفرحان وفي ناس مكانتش عايزة تمشي, أمي كالعادة أبدعت في كل الأصناف اللي عملتها واللي فضلت 3 أيام بتعمل فيها وانا واختي اتهدينا في الشقة قبل وبعد الحفل ونفخ البلالين والزعيق للعيال عشان يبطلوا دوشة وقصص كتير كدة
مبرووووووووووووووووووك لأختي الجميلة ويارب يوفقها في اللي جاي لو هتكمل دراسة أو تشتغل أو تتجوز بقى وهي ونصيبها
دي شوية صور عشان الصور اتمسحت وخصوصا صور البلالين :(

تسلم ايدك يا أمي

الخميس، 30 يوليو 2009

عريس "لوكتة" ولا أجمل ولا أروع ولا أحسن



احترت حقيقة في التعريف الدقيق واللغوي والصحيح لمعنى كلمة "عريس"..فهل العريس ده هو البني آدم اللي ممكن يشوفني "شكلاً" أعجبه يقوم يقول هي دي ويسأل عني عشان ييجي يزورنا خبط لزق ما انا شكلي عجبه؟! ولا هو البني آدم برضو اللي بيبعتلي حد يجس نبضي ويعرف اذا كنت مرتبطة ولا لأ عشان لو كدة يخلع من برة برة؟! ولا هو البني آدم اللي معرفوش أصلا بس واحدة قريبتي تقولي عليه ده لقطة محترم وأخلاق وكويس ولايقلك قوي مستخسراه في غيرك أكلم أهله عليكِ وأرشحك ليهم يمكن يحصل نصيب؟!! ولا هو البني شخص اللي بيرسم عليا دور اللي بيحبني بس لازم نعرف بعض أكتر يعني نخرج سوا ونتفسوح شوية كدة ونعيشلنا يومين قبل ما يروح لأهلي؟! ولا هو البني شاب اللي بيطلب يرتبط بيا في الجامعة اذ ربما نكمل بعد الجامعة ونتجوز؟!ولا هو الحد الجد المحترم اللي يعاكسني عالموبايل ولما أهزأه مرة واحدة واسيبه بعد كدة يرن يقوم باعتلي رسايل وبعدين يتصل من رقم تاني يقولي اني انسانة محترمه ومفيش مني عشان كدة هو قرر يرتبط بيا ومفيهاش حاجة لو شفته مرة عشان اقول رأيي لأنه حبني فعلا وهيرتبط بيا حتى لو كنت أكبر منه بسنتين؟؟!! ولا هو البني سخص اللي يكلمني مرة واحدة بس عالنت يقوم يعجب بشخصيتي وكلامي وووووو..إلخ فيطلب يشوف صورتي ورقم موبايلي عشان نتعرف أكتر عشان هو بيدور على عروسة دماغها زي دماغي وشخصيتها قريبة مني وده بقى بيبقى أنواع كتير..اللي مسافر برة مصر ومتخيل ان مينفعش أقوله لأ مبحبش اتعرف على حد لأنه لقطة"من وجهة نظره" ونوع تاني مبيحبش جواز الصالونات وبيقلك أنا دغري ومبحبش اللف والدوران صحيح دي أول مرة نتكلم بس انت عجبتيني مفضلش غير اشوف صورتك واسمع صوتك وياسلام لو نتقابل عالأقل مرة عشان آجي أخطبك انا مهندس وشغال في شركة بترول بس مش فاضي أدور على عروسة ومش عايز واحدة متخلفة ودماغها تعبانة؟!! ولا هو قريبك اللي شايف انه يعرفك كويس وشايف انك كويسة وتستاهلي يتكرم عليك ويشيلك اسمه وبعد ما هو لف ودار كتيييير لقى ان اللي يعرفه أحسن من اللي ميعرفوش وزيتنا يبقى في دقيقنا وخلاص بقى بدل ما تعنسي...؟؟!!!
دي بعض الأشكال اللي ممكن تصادفنا مش كلها..طبعا مناسبة الكلام ده هي العريس "اللوكتة" اللي جالي وخلاني قررت أكتب عنه بوست مع اني مش بحب اكتب عن هم الحب والارتباط والجواز والعرسان لأن الصمت أحيانا بيبقى أبلغ من الكلام.
معرفش ليه افتكرت صاحبتي في الجامعة اللي اتخطبت لواحد قريبها من بعييييييييد ما اتكلموش ولا مرة حتى وهو مسافر برة مصر جم اهله خطبوها وهو مسافر واشترولها الدبلة ولبسوهالها لحد ما ييجي ويقعدوا مع بعض وده لأنها بيجيلها عرسان كتير وهو خايف لتطير..أنا طبعا كنت بقولها انت كدة مش مخطوبة انت محجوزة...
وافتكرت كمان واحدة تانية كانت زميلتي في دار المغتربات لما حكيتلي انها اتجوزت بنفس الطريقة تقريبا يعني اتخطبت سنتين لصوت بتكلمه في التليفون وقبل الفرح باسبوع جه من السفر واتجوزوا وقعد شهر تقريبا أو أقل وسافر تاني وهي طبعا بقت حامل ولحد ما كنت معاها كانت في الشهر التاسع وجوزها مش هيشوفها ولا هيشوف بنته الا بعد سنتين تقريبا وكل الفرق انها سابت بيت أهلها وبتخدم في بيت أهل الراجل اللي جه قعد معاها شهر وسافر
أنا كنت ناوية أكتب بوست كوميدي بس معرفش ليه قلبت معايا نكد كدة؟؟ ما علينا سيبكم من كل ده واسمعوا حكاية العريس اللوكتة اللي جالي....
من يومين كنت في فرح اخت صاحبتي لقيت صاحبتي بتقولي في الفرح عندي ليك خبر حلو هقولك عليه بعدين..ولأني كنت في فرح صاحبتي دي من كام شهر بس وغالبا المعازيم هم هما ولأن كلمة خبر حلو في فرح ليها مغزى فهمت قصدها وقعدت بيني وبين نفسي أحضر نفسي للي هقولهولها لما أعرف الخبر الحلو ياترى هقولها اني مبحبش فكرة الجواز بالطريقة دي واحد عجبه شكل واحدة وميعرفش مضمونها ولا شخصيتها عاملة ازاي قام قال أشوفها, ولا أصبر واهدى كدة واقولها ربنا يسهل..قلت أركز في تصوير العروسة احسن وفكني من اللي قالته والحمد لله اني لما بروح فرح لا بلبس لينسز ولا نضارة وانا نظري بعافية فبرتاح من احساس ان في حد بيبصلي وبريح نفسي من اني آخد بالي من أي حد..بس وعدى اليوم
ولقيت صاحبتي وهي بتوصلني بعربية جوزها بتقولي جايلك عريس وغني قوي (الكلمة اللي مبحبهاش عشان بتحسسني اني بضاعة) لقيت أختي بتضغط عليا عشان أسكت ومردش الا لما أسمع للآخر..و لقيت صاحبتي بتقولي: بصي ياستي هو فلسطيني (اذبهليت وسبتها تكمل) عايش في ليبيا (كمان وسبتها تكمل وانا ساكتة) هيبعتلك تذاكر انت واللي تختاريهم من أهلك عشان تروحوا تشوفوه وتقرروا (مش هوصفلكم تعبيرات وشي ساعتها,قلتلكم ان طبعا ساعات الصمت بيكون أبلغ من الكلام) لو معجبكيش مش مشكلة هترجعوا تاني واهو اسمكم اتفسحتوا(أظن مفيش كلام ممكن يتقال) ها ايه رأيك؟ ..تفتكروا ايه اول كلمة ممكن تطلع مني بعد اللي سمعته؟؟(ايوة هي دي بس أنا مقلتهاش عشان انا مبحبش اتلفظ بألفاظ وحشة) أول حاجة سألتها لصاحبتي بعباطة هي..هو مكانش في الفرح وشافني؟؟!! ردها: لأ ناس شافوكي وقالوله عليكي وشكروا فيكي...ولقيتها خدت بالها أخيرا من تعبيرات وشي واختي اللي بتكتم الضحك ومتابعة تعبيرات وشي برضو, قامت قالتلي: أنا لو منك أسافر أتفسح وأرجع اقول معجبنيش يعني هتخسري ايه..؟!! فكري وهستنى منك تليفون أعرف رأيك عشان أبلغه للناس...!!!
نزلت وأنا مذبهلة ومش بتكلم وأول ما دخلنا البيت أختي حبيبتي طلعت كل اللي كاتماه من ضحك وجريت على ماما والحقي بنتك جالها عريس لقطة محصلش
أمي حبيبتي بقى رد فعلها كان لذيذ برضو..قالتلي: انت صحيح مطلعة عيني وقارفاني ومغلباني ونفسي أخلص منك النهاردة قبل بكرة..بس مش لدرجة اني أرميكي ووضحتلي حاجة كمان..قالتلي: الفلسطيني اللي بيسافر برة واقامته تسقط بيبقى صعب أو مستحيل يرجع تاني مفهمتش قصدها قوي بس اللي فهمته ان اللي هتتتجوز الاخ ده مش هترجع بلدها تاني تقريبا...!!!!
أسئلة مهمة بقى...في واحدة ممكن فعلا توافق تتجوز بالطريقة دي؟؟ في أهل واحدة ممكن يوافقوا يعملوا في بنتهم كدة؟؟ايه اللي ممكن يخلي واحدة عاقلة تعمل في نفسها كدة وما حدش يقولي عنوسة والبنات مش لاقية والكلام البايخ ده؟؟ازاي أصلا حد يجيب لحد عرض زي ده وازاي يستنى منه موافقة؟؟تفتكروا ده يبقى اسمه عريس؟؟

الأربعاء، 29 يوليو 2009

نجحت رسمي فهمي نظمي ...الحمد لله:)



نتيجتي ظهرت وطلعت عالنت كمان والحمد لله نجحت رسمي فهمي نظمي بفضل الله وطلعت الأولى على شعبتي صحيح بجيد بس وكان نفسي في تقدير أعلى
بس الحمد لله على كل حال :)
وأختى كمان اتخرجت من نفس الشعبة بتقدير جيد

الحمد والشكر لله :)
.
.
.
.
.
.
.
.
.
.
.
.
.
.



إستنوا البوست الجاي..أصل جالي عريس (لوكتة) مينفعش مكتبش عنه S:D:

الاثنين، 13 يوليو 2009

حرية المرأة في مصر..زائفة..زائفة





يتحدث الكثيرون عن الحرية التي نادت بها المرأة ونالتها عنوة, والغالبية رافضين لهذه الحرية, وأسمع على لسان رجال أثناء سيري في الشارع كلمات تثير الغيظ من نوعية "ناقص إيه كمان معملتوهوش" و" فاضل إحنا اللي ننادي بحريتنا"و"مش كفاية عليكوا عربيتين في المترو", أتعجب كثيرا ممن يرفضون هذه الحرية التي لم أزل أبحث عنها؟!! فأين هي الحرية التي يتحدثون عنها ونحن- فتيات وسيدات- لازلنا نخشى السير بمفردنا في الشارع خشية المضايقات والتحرشات والتي...إضغط لقراءة الموضوع في مجلة رؤية مصرية

الأحد، 5 يوليو 2009

لحد إمتى هيفضل المصري رخيص؟؟؟



مش عارفة ابدأ كلامي بإيه ولا أقول ايه بجد, لما تابعت قضية مروة الشربيني المصرية اللي اتقتلت في ألمانيا وبرود الألمان تجاه الموضوع حسيت قد ايه احنا رخاص طبعا احنا رخاص جوة من زمان وده خلانا رخاص برة كمان مروة ماتت عشان عربية مصرية مسلمة محجبة على ايد متطرف ألماني وبسكين واكتر من عشر طعنات وجوزها لما جه يحميها طعنه المتطرف تخيلوا محكمة يحصل فيها كل ده والقاضي والناس كلها بيتفرجوا محدش فكر يتدخل عشان ينقذ المسكينة دي من ايد الالماني الارهابي أيوة ارهابي هو ده الارهاب بجد , ولما حب ظابط يتدخل أطلق النار على اللي مش الماني شفتوا الحلاوة لما جه يفض الاشتباك بعد ما روح مروة فاضت ضربوا الغريب مش الجاني اللي كمان متكتمين اسمه..والأدهى ان الاعلام هناك تجاهل الخبر طبعا ماهي عربية مصرية ومسلمة وكمان محجبة يهتموا ليه يعني؟؟
تفتكروا حق مروة هيرجع؟؟حق ابنها اللي شاف امه بتموت وابوه بيضرب قدام عينيه وهو لسة طفل هيرجع؟؟ حق جوزها اللي ضربوه بالرصاص هيرجع؟؟ لحد امتى هيفضل المصري رخيص في بلده وبراها؟؟ تفتكروا لو عكسنا الوضع واللي ماتت ألمانية على ايد مصري وبالصدفة حكومتنا كانت هتسكت؟؟ الألمان كانوا هيسكتوا؟؟ لحد امتى هنفضل رخاص قوي كدة؟؟

البنت المصرية اللي قضيتها تشبه لحد كبير قضية سوزان تميم واللي قتلها الاماراتي في مصر والحكومة المصرية رفضت نشر صورته..تفتكروا أهلها هياخدوا حقها..شفتوا الفرق بين القضيتين واحدة نامت لأن بطلتها مصرية والتانية لأن بطلتها مش مصرية ....

وآدي خبر كمان:

شرطي أمريكي يقتل شاباً عربياً ويعود إلى الخدمة ليردي شخصاً آخر


بجد بأسف على حالنا وبأسف على اللي احنا فيه وبرضو بسأل لإمتى هنفضل رخاص قوي كدة؟؟؟

الخميس، 25 يونيو 2009

"نفسي"


"نفسي"



أيوة نفسي..نفسي أتجنن, نفسي أفرح..نفسي أحس اني حرة أجري وألعب وأتنطط, نفسي أروح ملاهي وألعب كل الالعاب الصعبة واللي بتدوخ وألعاب الاطفال, نفسي أركب موتوسيكل وأسيب شعري حر يطير مع الهوا وأمسك ايشارب في ايدي أفردها وأطيره وانا مبسوطة..نفسي أجري عالشط وأمسك طيارة ورق واطيرها لفووووووووووق..نفسي ألبس بدلة غطس واغطس في قلب البحر, نفسي أتعلم السباحة وركوب العجل, نفسي أدخل سينما بليل, نفسي أقابل الانسان اللي يسرقني مني ويكون يستاهلني وأستاهله, نفسي أعيش لحظات حلوة, نفسي محسش اني وحيدة, نفسي يبقى عندي بنوتة زي القمر, نفسي أكمل دراستي وابقى دكتورة جامعية, نفسي أبقى قوية ودمعتي مش قريبة, نفسي أبطل حاجات كتير مش بتعجبني فيا, نفسي أضحك من قلبي, نفسي أحس اني مبسوطة..نفسي

الأربعاء، 22 أبريل 2009

وحشتوووووووووووني

وحشتني مدونتي قوي قلت أدخل اقول كلمتين

متنسوش تدعولي عشان امتحاناتي قربت

عندي حكاوي كتيييييييييير قاااااااااااااااد كدة
بس تيجي الأجازة وأروق وأغرق البلوج بوستات
:)
سلام مؤقت

الخميس، 19 مارس 2009

تحيةٌ إليكِ





تحيةٌ إليكِ

عنيدةٌ كنتِ
بربكِ استعنتِ
كالصلبة وقفتِ
لأجلنا صبرتِ
******
عظيمةٌ أنتِ..في ضعفك قوة
جميلةٌ أنت..في فلبك رحمة
قويةٌ أنت..في روحك جنة
******
كالشمعة احترقتِ..أنرتِ طُرُقَنا
كالجبل شَمَختِ..قوَّيتِ ظهورنا
بالصبر تحليتِ..أقمتِ حياتنا
******

كبرنا..وهِنْتِ
في وهنكِ قوة
عظيمةٌ انتِ
عظيمة أمي
*******************


لا تسعفني كلماتي حينما اود التحدث عنها.. ولا أعرف لما..!! لكن للكلمات كل الحق..فبماذا تسعفني؟؟ وما الذي تستطيع ان تصفه وكيف لي أن أحصي ما أريد قوله؟؟!! هل أحكي عنها؟؟ إذن ماذا اسرد لكم وبم ابدأ؟؟ أأحكي عن سيدة لم يعرفها أحد إلا ورفع قبعته ثم إنحنى لها تعظيما وتبجيلاً..سيدة صلبة تحملت عناءنا وحدها لسنوات قاربت العشرون ولم تشك لأحد.. سيدة عودتنا حب الخير وحب الغير....سيدة ربتنا على الكرامة وعزة النفس.. سيدة رفضت كل المساعدات لنشب برؤؤسٍ مرفوعة..سيدة لم تجبرنا على أمر لم نرغبه ابداً..سيدة لم تتفوه أمامنا بلفظ سيء قد تعتاده ألسنتنا..سيدة قسينا عليها كما قسى عليها زمانها..وتحملت..رضيت بكل ما كتبه لها ربها وصبرت عليه..لم تشتكِ إلا له ولم تطلب إلا منه..
ربما لن تقرأ كلماتي..وربما لو قرأتها لتعجبت.. كيف أكون دائماً وكثيراً على خلاف معها وأنا أعرف حقها
ربما انا نفسي لا أعرف لم أقسو عليها وهذا ليس حقاً لي كما هو حقاً لها.. ربما لأنها عودتنا أن تتحملنا دائماً
ربما أختلف معها كثيراً بحق ودون حق..ربما لا أعطيها حق قدرها..ربما أُحملها ما هو فوق طاقاتها
لكني رغم كل شيء أحبها.. لا لأنها أمي فقط..ولكن لأنها أيضاً سيدة عظيمة..
سيدة تستحق كل كلمات الثناء والشكر والعرفان بالجميل
قديما لم نشعر بجميلها الذي صنعته.. لكننا الآن نشعر به وبها وبما فعلت معنا
وليتنا نستطيع موافاتها حقها

أمي الحبيبة..تحية إليكِ







الجمعة، 13 مارس 2009

أشتاق إليك

حقاً إشتقت إليك...
اشتقت للمسات حنانك
التي كنت تغدق علّي بها
بل علينا جميعا
إشتقت لأن تضمني إليك
وتحتضنني بقوة
إشتقت لأن تربت على كتفي
بيديك الضخمتين
إشتقت لتدليلك لي
حقاً إشتقت إليك...
إشتقت لصوتك الرخيم
اشتقت لسماعه يرشدني
إشتقت لسماعه ينهرني
حقاً اشتقت إليك...
اشتقت لرؤياك
اشتقت لملامحك باسمة
اشتقت لها ساخرة
اشتقت لرؤياك غاضباً
حقاً اشتقت إليك...
اشتقت لتوبيخك
اشتقت لوعيدك
اشتقت لكل تعابيرك
حقاً اشتقت إليك...
قد أتظاهر بالقوة دونك
قد نتظاهر بها جميعاً
لكنك تسكننا...تسكنني
قد لا ننتظر عودتك
قد أكون تعودت غيابك
لكنك بداخلي..بذاكرتي
حقا
اشتقت لروحك الجميلة
روحك الساخرة المتمردة
حقاً اشتقت إليك...
لم ولن أجد عنك بديلاً
ليتك معي الآن
ليتك بجانبي تساندني
ليتك هنا لأستمد منك قوتي
ليتك هنا لتتغير حياتنا جميعاً
حقاً اشتقت إليك...
كلنا في اشتياق لك
في اشتياق لكل ما هو منك
ليتك تعلم كم أحبك
كم أشتاق إليك
كم أحتاج إليك
كم نشتاق جميعاً للعيش في كنفك
ليتك تعلم مدى وفاءنا لك
أبي الحبيب
حقاً نحتاج إليك
حقاً اشتقت إليك

الأربعاء، 25 فبراير 2009

إيجيبشن بوي ياهوي egyption boy

مساء الخير..

مش عارفة انا ليه بقيت بخيلة قوي على مدونتي..!!
ما علينا كالعادة أجلت ميعاد سفري للكلية يومين كدة
وبعدين قلت أدخل أبص عالمدونة وأفتكرها بكلمتين مع ان والله كنت جاية ونفسي أكتب في حاجات كتير قوي
بس معرفش ايه اللي بيحصلي حالة من التجمد باين :))
المهم انا دلوقت عايزة أحكي حكاية غريبة قوي أو بمعنى أصح عن شخصية غريبة قوي قابلتها خليكوا معايا واحدة واحدة عشان اعرفكوا عليها زي ما أنا اتعرفت واستغربت
_________

أيام امتحاناتنا اللي فاتت نزلنا انا وأميرة صاحبتي عشان نقابل أخوها في التحرير قبل ما يسافر عشان تاخد منه حاجة ولا تديله حاجة ما علينا احنا طبعا إتأخرنا جدا على أخوها.. كنا راكبين ميكروباص من حلوان للتحرير عشان المفروض نقابله قدام هيلتون رمسيس وطبعا الميكروباص جه عند أول التحرير ووقف في اشارة مدة طويلة جدا واحنا مش عارفين نعمل ايه ننزل من الميركوباص ونكمل مشي ولا نفضل واخو أميرة بيتصل ومعاد السوبر جيت فاضل عليه دقايق واحنا واقفين ومتجمدين وتفكيرنا مشلول مش عارفين نعمل ايه لما لقينا ان مفيش أمل ان الميكروباص يتحرك قلنا ننزل وناخدها مشي ولا جري وبعد ما نزلنا لقينا طبعا الطريق كله طرق مرور وعربيات عشان نعديها بس محتاجين ساعة عدينا لحد ما وصلنا عند بوابة المتحف ولما لقينا خلاص اخوها على آخره قلنا ناخد تاكسي لهيلتون طبعا تفكيرنا مشلول مخدناش بالنا اننا كدة هنتأخر زيادة لأن التاكسي هيقف في اشارات وزحمة ده لو لقينا تاكسي يرضى يودينا خطوتين بنبص كدة لقينا جنب المتحف تاكسي سايقه شاب ميتعداش 25 سنة لابس كاب جيش وشعره طويل شويتين وحاطط سماعات في ودنه ومتأمرك سوسو خالص ما علينا
قلناله عايزين نروح هيلتون رمسيس بس بسرعة
قالنا:ok
كل ما نتكلم انا ولا هي نلاقيه يقولنا: إن إنجليش بليز,
نبص لبعض ونستغرب ونقوله: أوك كويكلي بليز وهاري أب المهم نوصل
طبعا التاكسي وقف في اشارة وزحمة وده اللي كنا معملناش حسابه, وسوسو (قصدي السواق) كل كلامه يس ونو وبليز وان انجليش لما اتفقعنا فأميرة راحت قالتله : وليه انجليزي واحنا مصريين؟؟!!
رد عليها بكل فخر: أصل الواحد من كتر ما بيتعامل مع سياح خلاص بقى العربي بتاعه قليل انا إتعاملت مع سياح كتير وبتكلم لغات كتير وفضل يعد اللغات اللي يعرف يتكلمها واحنا هنتجنن
أميرة سألته: انت معاك شهادات ايه؟؟
رد بحمقية وعصبية ودفاع (معرفش عن ايه): مش كل اللي معاهم شهادات جامعية بيعرفوا انجليزي انا الانجليش بتاعي أحسن من بتاع أي خريج جامعة وأضاف: المصريين دول تعبانين ويشاور يمين وشمال على ناس ويقول بصوا هما دول المصريين بصوا عاملين إزاي الواحد مش عارف ازاي عايش هنا ..!!
أنا طبعا مرارتي مفقوعة وبفضل السكوت في الحالات دي بس لقيتني بقوله : وانت عايش فيها ليه دي متستهلكش سافر وسيبها
رد عليا بآلاطه (معرفش على ايه): اه ما أنا مسافر فينيس عشان البرنسيس بتاعتي هناك مستنياني بس مستني شوية
لقيت أميرة مصرة تعرف هو معاه شهادة ايه قالت له: طب معاك دبلوم يعني؟ او اعدادية ؟
هو بغيظ:لأ
أميرة: طب وصلت في التعليم لفين؟؟
قاطعها وكأنه هيضربها لو سألت عن التعليم تاني: أنا ماعييش شهادات بس معايا خبرة صحيح خرجت من الابتدائية من المدارس عشان اشتغل وأديني بقيت أحسن من اللي معاهم شهادات جامعة وبعرف لغات هما ميعرفوهاش
سألناه : تعرف تكتبها
رد بكل آلاطة: لا دي ممارسة بنطقها أحسن من أي حد اللغات مش شرط تعرف تكتبها ..!!
طبعا أنا ماسكة نفسي كل ده عشان نوصل لأني كان نفسي اخبطه بحاجة في دماغه أفوقه من اللي هو فيه خصوصا وهو عمال يشاور على كل حاجة بقرف ويقول هي دي مصر هما دول المصريين وكأنه جاي من أمريكا وكلامه في النص بيلزقله كلام انجليزي مظنش هو نفسه فاهمه ولا حتى بينطقه صح لأني مفهمتوش أصلا بس لما كنت بلقط كلمة أعرفها بصححهاله طبعا
لقيتي بقوله: تعرف فرنساوي؟
هو: طبعا
أنا: طب كومان سا فا؟
هو: لاااااااااااااااااااااا انا اعرف كلمات الحب والغزل الفرنسية بس "أمور بونسوار بونجور"
أنا بكل استنكار(تريقة): ايه ده يعني متعرفش كليتا ناسيوناليتِ ولا كا لي جا تِ؟؟!! ياعيني يلا بالممارسة هتتعلمهم لما تروح فينيس :))
أميرة طبعا دخلت بالكلمتين الألماني اللي فاكراهم من ثانوي :))
وأخيرا جه الفرج ووصللنا ولما سألناه تاخد كام قالنا "اني ثينج" الماديات مش بتفرق كله كلام فاضي
ثانك يو آي آند باي :))
نزلنا بنقول الله يمسيك بالخير يا هنيدي"متأمرك ليه يا سوسو وليه عجلك تخين.. لوأصلك يوم تدوسه يفضلك بس مين"
طبعا كنا اتأخرنا على أخو أميرة وأخرناه على ميعاد السوبر جيت وبلاش أحكي عمل معانا ايه :$

ودي كانت شخصية شاب مصري معرفش يتقال عليه ايه؟؟!! بذمتكم مش حاجة تفقع؟؟!!

الأحد، 8 فبراير 2009

هيروبولس



منذ فترة - ليست بقليلة- فاجاني محمد التهامي – وهو صديق قديم وعزيز من الأصدقاء اللذين يندر وجودهم في زماننا- بانه يعتكف على إنهاء أولى رواياته ويريد رأيي فيها قبل أن يعرضها على أحد (عجيب التهامي فهو من الغرباء الذين يثقون في رايي وموهبتي أكثر من ثقتي شخصياً بها), وقتها لم يكن اكملها حتى النهاية لكنه حدد ملامح شخصياتها ورسمها ورتب الأحداث في ذاكرته, قرأت الجزء الذي أنجزه أولا, كانت تحكي عن الحياة الاجتماعية والتاريخية التي عاصرتها مدينة السويس خلال المائة عام الأخيرة, تبدأ بشخصيات قديمة قد ترجع لمائة عام وتنتهي بشخصيات موجودة في عصرنا الحالي...
اعجبت جدا بالرواية وشخصياتها وحاولت قدر الامكان ان اضيف لها شيئاً لكني لم أجد سوى بعض الترتيب لبعض الاحداث, استعجلته في كتابة الجزأ المتبقي منها وفي كل جزأ كان يبهرني الالمام بالأحداث التاريخية وكأنه عاشها حقيقةً وليس مجرد قارئ لها...
أثناء هذه الاحداث..حدثني التهامي عن إختمار فكرة في رأسه, قد يكون أول من يقدمها ويعرضها, وكانت فكرته الجديدة تدور حول مقدمة روايته فالمتعارف عليه أن يقوم كاتب كبير ذو تاريخ أدبي بكتابة المقدمة كنوع من الاثناء والتشجيع للكاتب الجديد, لكن التهامي قرر تغيير ذلك بأن يقوم هو بتقديم كاتب جديد قادم يقوم بكتابة مقدمة روايته..أعجبتني فكرة التمرد على ما هو سائد, ولكنه فاجأني بترشيحه لي لأقوم بذلك (كما حدثتكم انه من الغرباء الذين يقتنعون بي) وبعد تفكير قررت خوض التجربة, وهكذا قمت بكتابة مقدمة "هيروبولس" وقام تهامي بفرضي على الساحة الأدبية ككاتبة وليتني أستحق ذلك...
تم صدور الرواية ضمن إصدارات دار" أكتب للنشر والتوزيع" بمعرض الكتاب وتم عمل حفل توقيع صغير لها بالمعرض, وفي انتظار حفل التوقيع الثاني..
في لفتة جميلة من محمد كتب اهداء لكل حد حس انه ساهم في الرواية من مصحح لمصمم لناشر ليا باعتباري أول حد خد رأيه
مبارك لمحمد التهامي أولى رواياته"هيروبولس"
وبشكره على الاهداء :)

السبت، 7 فبراير 2009

في حيرة


في حيرة
حقاً أنا في حيرة..ولا أعرف سبباً حقيقياً لحيرتي تلك..أهو الخوف من الغد, أم هو الخوف من المجهول؟؟ لكني حقيقة الأمر من الخوف في غاية..أخشى على نفسي من الغد..أخشى من شخص قد أظنني أعرفه لأجدني لم أعرفه من قبل..قد يتغير وقد أكون أنا التي لم تره جيدأ, أخشى من شخص لا أعرفه..ربما لا يتحملني وربما لا أتحمله, أخشى من شخص يعرفني وأعرفه .. قد أُخطئ اختياره فيكون علي تحمل نتيجته, أخشى من شخص لايعرفني ولا أعرفه يقيدني..يسجن أحلامي وافكاري فلا يقدرني حق قدري..أخشى على نفسي.. أخشى من قدري...
عجيبة هي قضية الأقدار, فلم لا تكون أقدارنا معلومة كي لا نحتار..كي لا نخشى.. كي لا نقلق..كي نطمئن للغد..كي نطئن للغير..كي نرتاح, ليتك يا قدر تمنحني ما أبغى.. تمنحني ما أستحق..لا أريد تمضية عمري كالكثيرات ولا أريد أن أمضيه تعسية..مرغمة..شاردة..ناقمة..كارهة
حقاً أنا في حيرة..فكيف أختار ومن أختار؟؟ولم الآن حان وقت الاختيار؟؟ لم لا انتظر للغد دون حيرة؟؟لم يريدون تشتيت أفكاري وتعذيبي؟؟
ليتني أعي نفسي وأتفهمها جيداً كيلا أحتار...

الخميس، 5 فبراير 2009

غبت كتير :$ :$

عارفة اني غبت كتير قوي عن البلوج وعارفة اني كسولة جدا ومقصرة في حق مدونتي
بس اديني خلصت امتحانات ورجعت ويارب أعمل حاجة كويسة

رجعت وجوايا حاجات كتير...
كل فترة بتمر بتوريني حاجات كتير وناس أكتر
ناس غريبة وناس أغرب
عندي كالعادة حكايات كتير قوي
بس معرفش هكتبها ولا هكسل ولا هكبر
رحت المعرض 3 مرات لأول مرة في التاريخ ولتاني سنة أزوره في حياتي
جبت كتب كتير قوي(يارب ألحق أخلصها)
عايزة أقعد مع نفسي بقى عشان كل ما أتهرب منها تزنقني ومش بلاقي ليها مبرر
عايزة اتصالح معاها ومع حاجات كتير قوي بتحصلي
الفترة الاخيرة شفت ناس وحشة كتير واتصدمت كتير وتعبت كتير (على غير عادتي سابقاً)
كنت أسهل وأسرع واحدة تعيط في الدنيا.. وبدات أحس اني مباقاش عندي دموع مع الاسف
صحيح جالي الضغط وكنت هموت من فترة ويمكن اللي شفته وقتها هو اللي خلاني احس اني مش لازم اضعف
وبقى عندي نسبة من التحجر.. بس ساعات كتير بلاقيني لسة زي ما انا اقل حاجة بتخنقني وتبكي عيوني
حاسة اني كل فترة بتغير.. بس جوايا خنقة غير عادية عشان في ناس ليها كلام جوايا لازم يخرجلها عشان انا أرتاح
لأني حاسة اني شايلة الكلام ده هم على قلبي لحد ما اوصلهولهم ولأني مش بحب ابقى شايلة من حد عشان برضو بتخنق
لما بحس ان في حد في يوم كان ليه معزة عندي وطلع حد تاني او اتصرف تصرف مش فاهماه ولا قادرة استوعبه
بجد مخنوقة قوي من حاجات كتير ونفسي الخنقة دي تروح
مع كل ده الحمد لله بحاول ميبانش عليا اللي جوايا بضحك دايما عشان أهون على نفسي او عشان اللي جوايا ميظهرش
بس برضو ساعات كدة الواحد بيبقى مش قادر يتحمل زيادة
عموما انا مش عايزة أخنق نفسي زيادة لحد ما اقعد معاها كدة واشوف ايه اللي يرضيها واعملهولها عشان ترتاح وتريحني
طبعا في وسط كل ده بتحصل حاجات حلوة والله بتفرحني
ان شاء الله هحاول الملم نفسي كدة وأكتب كل اللي نفسي أحكيه
كمان قابلت ناس كتير في معرض الكتاب فرحت جدا بيهم لازمن أحكي عنهم
يلا اشوفكوا التدوينة الجاية بقى ويارب متكونش بعيدة :)