الأربعاء، 25 فبراير، 2009

إيجيبشن بوي ياهوي egyption boy

مساء الخير..

مش عارفة انا ليه بقيت بخيلة قوي على مدونتي..!!
ما علينا كالعادة أجلت ميعاد سفري للكلية يومين كدة
وبعدين قلت أدخل أبص عالمدونة وأفتكرها بكلمتين مع ان والله كنت جاية ونفسي أكتب في حاجات كتير قوي
بس معرفش ايه اللي بيحصلي حالة من التجمد باين :))
المهم انا دلوقت عايزة أحكي حكاية غريبة قوي أو بمعنى أصح عن شخصية غريبة قوي قابلتها خليكوا معايا واحدة واحدة عشان اعرفكوا عليها زي ما أنا اتعرفت واستغربت
_________

أيام امتحاناتنا اللي فاتت نزلنا انا وأميرة صاحبتي عشان نقابل أخوها في التحرير قبل ما يسافر عشان تاخد منه حاجة ولا تديله حاجة ما علينا احنا طبعا إتأخرنا جدا على أخوها.. كنا راكبين ميكروباص من حلوان للتحرير عشان المفروض نقابله قدام هيلتون رمسيس وطبعا الميكروباص جه عند أول التحرير ووقف في اشارة مدة طويلة جدا واحنا مش عارفين نعمل ايه ننزل من الميركوباص ونكمل مشي ولا نفضل واخو أميرة بيتصل ومعاد السوبر جيت فاضل عليه دقايق واحنا واقفين ومتجمدين وتفكيرنا مشلول مش عارفين نعمل ايه لما لقينا ان مفيش أمل ان الميكروباص يتحرك قلنا ننزل وناخدها مشي ولا جري وبعد ما نزلنا لقينا طبعا الطريق كله طرق مرور وعربيات عشان نعديها بس محتاجين ساعة عدينا لحد ما وصلنا عند بوابة المتحف ولما لقينا خلاص اخوها على آخره قلنا ناخد تاكسي لهيلتون طبعا تفكيرنا مشلول مخدناش بالنا اننا كدة هنتأخر زيادة لأن التاكسي هيقف في اشارات وزحمة ده لو لقينا تاكسي يرضى يودينا خطوتين بنبص كدة لقينا جنب المتحف تاكسي سايقه شاب ميتعداش 25 سنة لابس كاب جيش وشعره طويل شويتين وحاطط سماعات في ودنه ومتأمرك سوسو خالص ما علينا
قلناله عايزين نروح هيلتون رمسيس بس بسرعة
قالنا:ok
كل ما نتكلم انا ولا هي نلاقيه يقولنا: إن إنجليش بليز,
نبص لبعض ونستغرب ونقوله: أوك كويكلي بليز وهاري أب المهم نوصل
طبعا التاكسي وقف في اشارة وزحمة وده اللي كنا معملناش حسابه, وسوسو (قصدي السواق) كل كلامه يس ونو وبليز وان انجليش لما اتفقعنا فأميرة راحت قالتله : وليه انجليزي واحنا مصريين؟؟!!
رد عليها بكل فخر: أصل الواحد من كتر ما بيتعامل مع سياح خلاص بقى العربي بتاعه قليل انا إتعاملت مع سياح كتير وبتكلم لغات كتير وفضل يعد اللغات اللي يعرف يتكلمها واحنا هنتجنن
أميرة سألته: انت معاك شهادات ايه؟؟
رد بحمقية وعصبية ودفاع (معرفش عن ايه): مش كل اللي معاهم شهادات جامعية بيعرفوا انجليزي انا الانجليش بتاعي أحسن من بتاع أي خريج جامعة وأضاف: المصريين دول تعبانين ويشاور يمين وشمال على ناس ويقول بصوا هما دول المصريين بصوا عاملين إزاي الواحد مش عارف ازاي عايش هنا ..!!
أنا طبعا مرارتي مفقوعة وبفضل السكوت في الحالات دي بس لقيتني بقوله : وانت عايش فيها ليه دي متستهلكش سافر وسيبها
رد عليا بآلاطه (معرفش على ايه): اه ما أنا مسافر فينيس عشان البرنسيس بتاعتي هناك مستنياني بس مستني شوية
لقيت أميرة مصرة تعرف هو معاه شهادة ايه قالت له: طب معاك دبلوم يعني؟ او اعدادية ؟
هو بغيظ:لأ
أميرة: طب وصلت في التعليم لفين؟؟
قاطعها وكأنه هيضربها لو سألت عن التعليم تاني: أنا ماعييش شهادات بس معايا خبرة صحيح خرجت من الابتدائية من المدارس عشان اشتغل وأديني بقيت أحسن من اللي معاهم شهادات جامعة وبعرف لغات هما ميعرفوهاش
سألناه : تعرف تكتبها
رد بكل آلاطة: لا دي ممارسة بنطقها أحسن من أي حد اللغات مش شرط تعرف تكتبها ..!!
طبعا أنا ماسكة نفسي كل ده عشان نوصل لأني كان نفسي اخبطه بحاجة في دماغه أفوقه من اللي هو فيه خصوصا وهو عمال يشاور على كل حاجة بقرف ويقول هي دي مصر هما دول المصريين وكأنه جاي من أمريكا وكلامه في النص بيلزقله كلام انجليزي مظنش هو نفسه فاهمه ولا حتى بينطقه صح لأني مفهمتوش أصلا بس لما كنت بلقط كلمة أعرفها بصححهاله طبعا
لقيتي بقوله: تعرف فرنساوي؟
هو: طبعا
أنا: طب كومان سا فا؟
هو: لاااااااااااااااااااااا انا اعرف كلمات الحب والغزل الفرنسية بس "أمور بونسوار بونجور"
أنا بكل استنكار(تريقة): ايه ده يعني متعرفش كليتا ناسيوناليتِ ولا كا لي جا تِ؟؟!! ياعيني يلا بالممارسة هتتعلمهم لما تروح فينيس :))
أميرة طبعا دخلت بالكلمتين الألماني اللي فاكراهم من ثانوي :))
وأخيرا جه الفرج ووصللنا ولما سألناه تاخد كام قالنا "اني ثينج" الماديات مش بتفرق كله كلام فاضي
ثانك يو آي آند باي :))
نزلنا بنقول الله يمسيك بالخير يا هنيدي"متأمرك ليه يا سوسو وليه عجلك تخين.. لوأصلك يوم تدوسه يفضلك بس مين"
طبعا كنا اتأخرنا على أخو أميرة وأخرناه على ميعاد السوبر جيت وبلاش أحكي عمل معانا ايه :$

ودي كانت شخصية شاب مصري معرفش يتقال عليه ايه؟؟!! بذمتكم مش حاجة تفقع؟؟!!

هناك 11 تعليقًا:

  1. عيوني بتقول ان دي خيبه بعيد عنك

    كل واحد ميفهمش حاجه في اي حاجه وعامل نفسه عالم

    وان الناس مبقتش تهتم بالتعليم وقللت قمته وكل ما تكلمي حد يقولك هم الي اتعلموا اخدوا ايه

    تقبلي مروري
    مجنووون

    ردحذف
  2. ههههههههههه
    انتو عسل والله انت و أميرة..
    على فكرة التكاسي دي تشوفي فيها ناس غريبة أشكال و ألوان :))
    أنا فاكرة في يوم ركبت تاكسي غريب جدا..
    منجد الفرش بتاع العربية شبه صالونات زمان كدة و عامل الدريكسيون على شكل حاجة غريبة كدة طالع منها تعبان :)) اه والله

    و أوكريت الباب على شكل قرن غزال و هو أصلا شكله غريب أوي
    مطول شعره زي أبهاتنا زمان أيم الشارلستون و الحجات دي ههههههههه

    و لابس قميص مشجر برده غريب كدة و مشغل أغاني قديمة غريبة جدا..

    أنا في الأول خفت منه وبعدين قلت يا حرام أهو دا اللي واقع من زمن تاني أو يمكن قرر يروحلو عشان مش عارف يعش في الزمن ده :))

    عموما أهي حجات الواحد بيشوفها يا يضحك يا يتعلم يا يعمل الليتنين :))

    سوري ديير طولت عليكي ههههههه

    تحياتي يا جميلة

    ردحذف
  3. عزيزتى

    طبعا ده مريض واكيد لاسع شويه

    بس فى بعض كلامه حقايق

    ايه فايدة الشهاده اذا كانت بلا فائده

    لصاحبها وللمجتمع

    وممارسة اى مهنه والخبره اهم مش الشهاده

    واللغه بالذات بتفيد احسن من ميت شهاده

    واقولك مفجاءه

    بيريز رئيس اسرائيل معهوش شهاده عليا

    وفى اروبا ممكن بنت ملونير ارتبط بسباك

    وميبقاش فى مشكله

    انت بقه وصحبتك ممكن ترتبطوا بسباك

    حتى لو حبيتوا اهلكم هيقبلوا

    لازم نبص للانسان واخلاقه وشخصيته

    قبل اى شئ

    تحياتى

    سلام

    ردحذف
  4. مجنون..شكرا لمرورك
    فعلا دي تبقى خيبة لو في شباب كتير زيه لأنه فعلا مش فاهم حاجة غير ان اللي بيتعلموا هما اللي غلط وهو أحسن منهم وده مش صح

    نورتني

    ردحذف
  5. إيناس حليم.. منوراني طبعا وتطولي براحتك البيت بيتك :)

    والله انت اللي ضحكتيني
    تقريبا كل واحد له طريقته في الهروب من واقعه وبناء واقع جديد ليه او زمن تاني زي الراجل بتاع الزمن التاني اللي بتحكي عليه :))
    وأدينا بنشوف:)
    نورتيني :)

    ردحذف
  6. احساس لسة حي..منورني

    ممكن يكون معاك حق

    وأنا معاك ان الممارسة مهمة جدا وأهم من الشهادة بس ده لو كانت فعلاً أكسبتنا
    يعني لو قيسنا على الولد اللي حكيت عليه فهو الانجليزي بتاعه واللغات اللي بيعدها مكانش متمكن منها زي ما بيحاول يصورلنا وده اللي خلانا نسأله على شهاداته

    كمان اعتراضنا مكانش على الشهادة وبس لكن اعتراضنا على انه متأمرك ومش عاجبه حد ولا حاجة ومتصور نفسه محصلش في كل حاجة وجه مكان غلط وده مش صح


    نورتني :)

    ردحذف
  7. والله انا عمرى ماحنسى اليوم ده بجد كان يوم غريب من اوله لحد اخر ساعة فيه وانا عن نفسى ممكن اتجوز سباك لو بحبه بس يكون يعرف لغات ويحبنى اكتر من نفسه وعنده طموح يسافر استراليا

    ردحذف
  8. سعيده بالتعرف عليكي في لقاء المدونين

    تمناياتي بالسعاده

    اينو :)

    ردحذف
  9. مدونتك جميلة و اسلوبك جميل
    و للاسف كل واحد يتعرف على اى حد اجنبى بيتقلب خواجة فى ثانية
    و يعيش فى الدور على الغلابة اللى حواليه

    بس لما يسافر و يتبهدل هناك و يعرف ان مفيش لعب و لا دلع .. هيعرف ان الله حق

    تحياتى

    ردحذف
  10. يتقال عليه شاب حنتريش
    يمشى وميجيش
    لو يوم تقله بخ
    يموت ولا يعيش

    وربنا يشفى كل مريض

    ردحذف
  11. الواد ده عايز السك على دماغه علشان يفوق من دور الوهم اللي معيش نفسه فيه

    ردحذف

يا ترى عيونك بتقول ايه؟؟؟