الخميس، 30 يوليو 2009

عريس "لوكتة" ولا أجمل ولا أروع ولا أحسن



احترت حقيقة في التعريف الدقيق واللغوي والصحيح لمعنى كلمة "عريس"..فهل العريس ده هو البني آدم اللي ممكن يشوفني "شكلاً" أعجبه يقوم يقول هي دي ويسأل عني عشان ييجي يزورنا خبط لزق ما انا شكلي عجبه؟! ولا هو البني آدم برضو اللي بيبعتلي حد يجس نبضي ويعرف اذا كنت مرتبطة ولا لأ عشان لو كدة يخلع من برة برة؟! ولا هو البني آدم اللي معرفوش أصلا بس واحدة قريبتي تقولي عليه ده لقطة محترم وأخلاق وكويس ولايقلك قوي مستخسراه في غيرك أكلم أهله عليكِ وأرشحك ليهم يمكن يحصل نصيب؟!! ولا هو البني شخص اللي بيرسم عليا دور اللي بيحبني بس لازم نعرف بعض أكتر يعني نخرج سوا ونتفسوح شوية كدة ونعيشلنا يومين قبل ما يروح لأهلي؟! ولا هو البني شاب اللي بيطلب يرتبط بيا في الجامعة اذ ربما نكمل بعد الجامعة ونتجوز؟!ولا هو الحد الجد المحترم اللي يعاكسني عالموبايل ولما أهزأه مرة واحدة واسيبه بعد كدة يرن يقوم باعتلي رسايل وبعدين يتصل من رقم تاني يقولي اني انسانة محترمه ومفيش مني عشان كدة هو قرر يرتبط بيا ومفيهاش حاجة لو شفته مرة عشان اقول رأيي لأنه حبني فعلا وهيرتبط بيا حتى لو كنت أكبر منه بسنتين؟؟!! ولا هو البني سخص اللي يكلمني مرة واحدة بس عالنت يقوم يعجب بشخصيتي وكلامي وووووو..إلخ فيطلب يشوف صورتي ورقم موبايلي عشان نتعرف أكتر عشان هو بيدور على عروسة دماغها زي دماغي وشخصيتها قريبة مني وده بقى بيبقى أنواع كتير..اللي مسافر برة مصر ومتخيل ان مينفعش أقوله لأ مبحبش اتعرف على حد لأنه لقطة"من وجهة نظره" ونوع تاني مبيحبش جواز الصالونات وبيقلك أنا دغري ومبحبش اللف والدوران صحيح دي أول مرة نتكلم بس انت عجبتيني مفضلش غير اشوف صورتك واسمع صوتك وياسلام لو نتقابل عالأقل مرة عشان آجي أخطبك انا مهندس وشغال في شركة بترول بس مش فاضي أدور على عروسة ومش عايز واحدة متخلفة ودماغها تعبانة؟!! ولا هو قريبك اللي شايف انه يعرفك كويس وشايف انك كويسة وتستاهلي يتكرم عليك ويشيلك اسمه وبعد ما هو لف ودار كتيييير لقى ان اللي يعرفه أحسن من اللي ميعرفوش وزيتنا يبقى في دقيقنا وخلاص بقى بدل ما تعنسي...؟؟!!!
دي بعض الأشكال اللي ممكن تصادفنا مش كلها..طبعا مناسبة الكلام ده هي العريس "اللوكتة" اللي جالي وخلاني قررت أكتب عنه بوست مع اني مش بحب اكتب عن هم الحب والارتباط والجواز والعرسان لأن الصمت أحيانا بيبقى أبلغ من الكلام.
معرفش ليه افتكرت صاحبتي في الجامعة اللي اتخطبت لواحد قريبها من بعييييييييد ما اتكلموش ولا مرة حتى وهو مسافر برة مصر جم اهله خطبوها وهو مسافر واشترولها الدبلة ولبسوهالها لحد ما ييجي ويقعدوا مع بعض وده لأنها بيجيلها عرسان كتير وهو خايف لتطير..أنا طبعا كنت بقولها انت كدة مش مخطوبة انت محجوزة...
وافتكرت كمان واحدة تانية كانت زميلتي في دار المغتربات لما حكيتلي انها اتجوزت بنفس الطريقة تقريبا يعني اتخطبت سنتين لصوت بتكلمه في التليفون وقبل الفرح باسبوع جه من السفر واتجوزوا وقعد شهر تقريبا أو أقل وسافر تاني وهي طبعا بقت حامل ولحد ما كنت معاها كانت في الشهر التاسع وجوزها مش هيشوفها ولا هيشوف بنته الا بعد سنتين تقريبا وكل الفرق انها سابت بيت أهلها وبتخدم في بيت أهل الراجل اللي جه قعد معاها شهر وسافر
أنا كنت ناوية أكتب بوست كوميدي بس معرفش ليه قلبت معايا نكد كدة؟؟ ما علينا سيبكم من كل ده واسمعوا حكاية العريس اللوكتة اللي جالي....
من يومين كنت في فرح اخت صاحبتي لقيت صاحبتي بتقولي في الفرح عندي ليك خبر حلو هقولك عليه بعدين..ولأني كنت في فرح صاحبتي دي من كام شهر بس وغالبا المعازيم هم هما ولأن كلمة خبر حلو في فرح ليها مغزى فهمت قصدها وقعدت بيني وبين نفسي أحضر نفسي للي هقولهولها لما أعرف الخبر الحلو ياترى هقولها اني مبحبش فكرة الجواز بالطريقة دي واحد عجبه شكل واحدة وميعرفش مضمونها ولا شخصيتها عاملة ازاي قام قال أشوفها, ولا أصبر واهدى كدة واقولها ربنا يسهل..قلت أركز في تصوير العروسة احسن وفكني من اللي قالته والحمد لله اني لما بروح فرح لا بلبس لينسز ولا نضارة وانا نظري بعافية فبرتاح من احساس ان في حد بيبصلي وبريح نفسي من اني آخد بالي من أي حد..بس وعدى اليوم
ولقيت صاحبتي وهي بتوصلني بعربية جوزها بتقولي جايلك عريس وغني قوي (الكلمة اللي مبحبهاش عشان بتحسسني اني بضاعة) لقيت أختي بتضغط عليا عشان أسكت ومردش الا لما أسمع للآخر..و لقيت صاحبتي بتقولي: بصي ياستي هو فلسطيني (اذبهليت وسبتها تكمل) عايش في ليبيا (كمان وسبتها تكمل وانا ساكتة) هيبعتلك تذاكر انت واللي تختاريهم من أهلك عشان تروحوا تشوفوه وتقرروا (مش هوصفلكم تعبيرات وشي ساعتها,قلتلكم ان طبعا ساعات الصمت بيكون أبلغ من الكلام) لو معجبكيش مش مشكلة هترجعوا تاني واهو اسمكم اتفسحتوا(أظن مفيش كلام ممكن يتقال) ها ايه رأيك؟ ..تفتكروا ايه اول كلمة ممكن تطلع مني بعد اللي سمعته؟؟(ايوة هي دي بس أنا مقلتهاش عشان انا مبحبش اتلفظ بألفاظ وحشة) أول حاجة سألتها لصاحبتي بعباطة هي..هو مكانش في الفرح وشافني؟؟!! ردها: لأ ناس شافوكي وقالوله عليكي وشكروا فيكي...ولقيتها خدت بالها أخيرا من تعبيرات وشي واختي اللي بتكتم الضحك ومتابعة تعبيرات وشي برضو, قامت قالتلي: أنا لو منك أسافر أتفسح وأرجع اقول معجبنيش يعني هتخسري ايه..؟!! فكري وهستنى منك تليفون أعرف رأيك عشان أبلغه للناس...!!!
نزلت وأنا مذبهلة ومش بتكلم وأول ما دخلنا البيت أختي حبيبتي طلعت كل اللي كاتماه من ضحك وجريت على ماما والحقي بنتك جالها عريس لقطة محصلش
أمي حبيبتي بقى رد فعلها كان لذيذ برضو..قالتلي: انت صحيح مطلعة عيني وقارفاني ومغلباني ونفسي أخلص منك النهاردة قبل بكرة..بس مش لدرجة اني أرميكي ووضحتلي حاجة كمان..قالتلي: الفلسطيني اللي بيسافر برة واقامته تسقط بيبقى صعب أو مستحيل يرجع تاني مفهمتش قصدها قوي بس اللي فهمته ان اللي هتتتجوز الاخ ده مش هترجع بلدها تاني تقريبا...!!!!
أسئلة مهمة بقى...في واحدة ممكن فعلا توافق تتجوز بالطريقة دي؟؟ في أهل واحدة ممكن يوافقوا يعملوا في بنتهم كدة؟؟ايه اللي ممكن يخلي واحدة عاقلة تعمل في نفسها كدة وما حدش يقولي عنوسة والبنات مش لاقية والكلام البايخ ده؟؟ازاي أصلا حد يجيب لحد عرض زي ده وازاي يستنى منه موافقة؟؟تفتكروا ده يبقى اسمه عريس؟؟

هناك 22 تعليقًا:

  1. ده لو انتى بضاعه على الاقل هو بنفسه هيجى عشان يشوف البضاعه الى هيشتريها ظروفها
    لكن انتى انسانه لحم ودم ومشاعر وكرامه
    احب اقولك انك انسانه عزيزه
    كمان عاوز اقولك ان فعلا فيه ناس لو جالها العرض ده هتوافق بدون تردد
    اجمل تحياتى

    ردحذف
  2. شفت؟؟
    على رأيك لو بضاعة كان جه شافها وأنا الحمد لله اني مش بضاعة ومحبش اكون زي البضاعة :)
    ميرسي لذوقك

    تفتكر بجد في ناس ممكن توافق عالعرض ده؟؟ انا مش مصدقة

    ردحذف
  3. انا جيت انا جيت انا جيت

    ردحذف
  4. اولا انا فرحان قوى بالموضوع ده
    لانى فى موضوع بفكر فيه من زمان
    انا كنت بفكر لو الواحد فكر يحب بنت
    هيحبها ازاى
    هو يعرف حاجه غير شكلها اصلا
    يعنى لو حد شافك فى الشارع
    هيحكم عليكى من شخصيتك ازاى
    هيضطر يراقبك
    ولا يعمل ايه
    السؤال ده محيرنى
    ونفسى الاقى اجابه
    الواحد ازاى يختار بنت
    يكون متاكد من شخصيتها
    قبل ما يعجبه شكلها
    دى مشكله انا معرفلهاش حل
    ثانيا
    جواز الصالونات بقى
    بتاع ام العريس تجيب الدبل والشبكه وتلبس العروسه
    وتتجوز كمان بدل ابنها
    ده ميمشيش بقى
    ده اسمه جواز
    مش شرا بضاعه

    ردحذف
  5. انا لسه مخلصتش قوى يعنى
    بس الموضوع عجبنى ككل
    وعقبال العريس اللوكته ده
    ما يكون من نصيبك

    ردحذف
  6. هههههههههههههههههههههههه

    مش قادرة امسك نفسى من الضحك يا بنتى ايه الناس دى وايه التفكير ده انا لو منك كنت رميت صاحبتك من العربية
    هههههههههههههههههههههههههههه

    عادى عادى لسة ياما هتشوفى
    هههههههههههههه

    ردحذف
  7. هههههههههههههههههههههههه

    مش قادرة امسك نفسى من الضحك يا بنتى ايه الناس دى وايه التفكير ده انا لو منك كنت رميت صاحبتك من العربية
    هههههههههههههههههههههههههههه

    عادى عادى لسة ياما هتشوفى
    هههههههههههههه

    ردحذف
  8. اولا اهنيكى على الموضوع بجد العرسان اللو كته دول انتشروااااااا اوى ايه ده والاستعباط بقى عينى عينك هما فاكرين البنات عبل ولا ايه؟ بجد بشوف مناظر تخليكى تقولى الدنيا جرى فيها ايه
    اما بالنسبة للمشكلة
    ايه ده؟ هو عايز عروسة ولا ايه بالظبط ؟ دى كلها حوارات بيشترى حاجة بفلوسهوهيرميها بفلوسه برضه وده ازاى تطمنى له ولا حكاية تتفسحى ههههههههه لا والنبى
    ايه الغباء ده وصاحبتك ازاى تقولك كده ترضاها على نفسها
    ربنا يبعدك عنك الناس الوحشة
    ويكرمك بحد يصونك ويحافظ عليكى
    تحياتى ليكى يا قمر

    ردحذف
  9. ده اللى بيسموه
    جواز دليفرى؟

    ردحذف
  10. THE illusionist...
    نورت نورت نورت :)

    والله انا برضو بستغرب من حكاية الشكل دي بس اللي بيبص على شكل بيبقى عايز ديكور مش انسانة بيبص براها مش جواها

    معرفش بصراحة المفروض الواحد يعمل ايه بس ايه المانع انك تراقبها؟ فكرة والله D:

    وجواز شرا البضاعة والحجز ده كمان مصيبة كبرى بس للاسف منتشر جامد

    أهلا بيك وبكل اللي نفسك تقوله طالما مخلصتش
    وميرسي لذوقك

    بس لو قلت تاني عقبال ما يكون من نصيبك تعرف انك تاخد الباب في ايدك وانت خارج اول ما تدخل وتورينا عرض...:@:@:@


    شكرا لمرورك :)

    ردحذف
  11. بسبسة حبيبتي..
    وحياتك انت كنت هرميها بس مسكت نفسي أصل الصمت أحيانا بيكون أبلغ من كل حاجة:))
    بس برضو يعني على رأيها هي كانت بتبلغني باللي وصلها يعني كانت هتعمل ايه في عريس لوكتة زي ده؟؟ تسيبه يطير من ايدي مثلا :))

    وعلى رأيك لسة ياما هنشوف D:

    ردحذف
  12. مي..معاك حق ياجميل ويارب يبعد عنا الناس دي
    صاحبتي كان كل قصدها تبلغني باللي اتقالها مش يمكن كنت اتخبط واوافق؟؟

    وبعدين سيبك انت لو مكانتش قالت كنت هكتب البوست ده ازاي يعني؟؟ D:

    ميرسي ليك ياقمر على مرورك وكامك ودعواتك ويارب يحمينا جميعا من كل سوء:)

    ردحذف
  13. غير معرف..حلوة جواز ديليفري دي :))

    ردحذف
  14. السلام عليكم
    مدونة مش هنسكت أصبحت مفتوحة للأعضاء فقط وتدعوكم للمشاؤكة معنا في ملتقاها وم الاثنين المقبل الموافق 3/8/2009 الساعة العاشرة مساءا بتوقيت القاهرة كميعاد للقائنا عبر الشات لمناقشة أوضاع المدونة وما ستئول إليه المدونة في الفترة المقبلة ومراجعة ما وصلنا إليه منذ إنشاء المدونة
    نسعد بحضوركم واهتمامكم عبر الإيميل الخاص بالمدونة : marwa_elsherbiny09@yahoo.com

    ردحذف
  15. roone el mwdoooo3 gamd bgd w kbeer awe ana f3ln msh 2dra asd2 n fe ay 7d mmkn ywaf2 3la 3rd zy da aw n asln fee nas kda bs 3gbne awe mwdoooo3 el fooos7a da hhhhhhh mtro7e f3ln ttfs7e wteeeeege ht5sre eaaaaaa y3ne

    ردحذف
  16. Noosha...law terdehale ana hafakar begad :D

    ردحذف
  17. عاجبني تفكيرك أوي في موضوع الجواز..مش عارف ليه فيه ناس كتير مستعجلة وخصوصا الاهالي..العملية فعلا بقت بيعة وشروة بالنسبة للناس والجاهز يشيل ده غير حوار الصالونات
    تحياتي

    ردحذف
  18. ايه ده هيبعتلك تروحى تشوفيه
    حلو قوى
    والله يابنتى لاتعليق

    ردحذف
  19. micheal...مينفعش نستعجل لأن ده جواز مش بيعة وشروة..الاستعجال فعلا بيخليه بيعة وشروة مش أمان واستقرار وحياة كاملة هتقضيها لازم نفكر كويس قبل ما ناخد القرار
    شكرا لمرورك :) نورتني :)

    ردحذف
  20. جي جي..شفتي الهنا هيبعتلي أنا اللي أروح أشوفه أظن بعد كدة ماليش حجة :))

    ردحذف
  21. اخيراااااااااا عرفت اعمل كومنت
    بجد رنا وحشتينى جدا جدا جدا
    موضوعك جميل اوى بس انا اكيد لو مكان البنت دى مش هوافق
    بكرة فى المصريين الرجعية اللى لسة راسخة فى العادات والتقاليد
    انشالله تكونى بخير ورمضان كريم صديقتى الجميلة

    ردحذف
  22. حسام.. منورني
    أخبارك ايه؟
    بس مش كل المصريين عندهم رجعية ومش كل العادات والتقاليد غلط بالعكس ساعات كتير بتبقى عادات نفتخر بيها وبتربطنا ببعض
    بشكر مرورك :)

    ردحذف

يا ترى عيونك بتقول ايه؟؟؟