الثلاثاء، 7 أغسطس، 2007

ليه عيون؟!!

لما قررت أرجع أفضفض بالكتابة وأعمل مدونة جديدة فضلت كتير قوي بدور على اسم ليها مش لاقية كل الأسامي
اتعملت بيها مدونات..فكرت..طيب أنا ليه عايزة أعمل مدونة ؟ وليه بلوجر؟ عايزة أعمل مدونة كنوع من التجديد ويمكن مدونة جديدة تعني حماس جديد بالنسبالي كمان عشان عايزة أفضفض عايزة أكتب..أتواصل مع عالم المدونين لأنه عاجبني جدا وشاددني...يمكن مش هتبقى مدونتي مختلفة ولا مميزة بس يكفي انها تبقى موجودة تنادي بيا وأنادي بيها أتكلم زي ما الكل بيتكلم أحكي عني عن اللي بيعجبني واللي مش بيعجبني...ليه بقى على بلوجر؟ يمكن تغيير ويمكن عشان كتير عامل على بلوجر ويمكن عشان كل أصحابي تطوروا لحد
ما وصلوا لبلوجر وانا عايزة اساير الجو والموضة في عالم التدوين..المهم اني عملتها وأصبح ليا مدونة على بلوجر طبعا ده بعد معاناة لأني بفهم بسرعة ومش بتعب ناس معايا وبطلع روحها زي سوسة ومحمد حمدي طبعا استفدت من دروس التدوين اللي عاملها محمد حمدي بجد بشكره عليها
نيجي بقى لموضوعنا ليه عيون؟!! بصراحة وأنا بدور قلت أدور على إسم يكون بيوصفني أو بمعني أصح قلت أدور على حاجة بعتز بيها جدا في حياتي بصيت حواليا كدة...تأملت كل اللي مبيفارقنيش فكرت لما بحب أخرج ايه اللي مينفعش أخرج من غيره؟ وبعد تفكير (مش طويل) لقيتني بصرخ وبقول...عيوني!! إزاي فاتت عليا دي دا أنا عندي8عيون ومقدرش أخرج أو حتى أقعد في البيت فترة طويلة من غيرها..مش بس لأن (نظري 6/6) لكن كمان عشان عيوني بتخليني أشوف كل حاجة حواليا..يعني رغم ان ليا 2 زي اللي عند كل الناس الطبيعية الا اني ما إكتفيتش بيهم نظرا لضعفهم ودورت على اللي يخليهم يشتغلوا بفاعلية أقوى لأن العيون من أهم أعضاء الإنسان بيهم بيتعرف على كل حاجة بنفسه بيحس الألوان حواليه بيشوف الناس...المهم اني قررت أسميها "عيون" أسوة بعيوني ال 8 وهم حسب ترتيب وجودهم معايا...
  • أول اتنين نعمة من ربنا إتولدت بيهم عادي زي كل الناس
  • تاني إتنين عبارة عن بروازين صغيرين لحماية الأولانيين لما بدأت أحس بزغللة ونغمشة وأنا بتفرج على جورج قرداحي في(من سيربح المليون) يعني تقريبا كدة وأنا في الثانوية العايمة من حوالي 5 سنين
  • تالت إتنين عملتهم السنة دي لزوم النيو لوك وعشان أخلص من عبء البروازين اللي فوق
  • رابع اتنين بقى غير معلم وجودهم لأنهم بيتغيروا كتير نظرا للاهمال الشديد المهم انهم جم لحماية الأولانيين والتالتين من أشعة الشمس الحارقة.
بس كدة هي دي حكاية ال 8 عيون
وعشان برضو ما أطولش عليكوا وأرغي كتير بتمنى إن عيوني تبقى سليمة ويعجبكم اللي هتشوفه وتحكيه ليكم هنا وإن شاء الله تبقى حاجة جديدة تضيف ليا

أهلا ومرحبا بكم في مدونتي الجديدة

هناك 6 تعليقات:

  1. متعرفيش انا فرحان ازاى انى ابقى صاحب اول تعليق فى اول بوست فى اول مدونه ليكى على بلوجر .. وان شاء الله متبقاش الاخيرة

    وبجد انتى قلم متميز واكيد هتعملى ضجه فى عالم المدونين بس انتى متستعجليش على رزقك بسس

    ربنا يوفقك

    ردحذف
  2. فعلا العيون أهم أعضاء الجسد أسم المدونه حلو وأنا زيك برده أحترت شويه اما حبيت أختار اسم لمدونتي ومالاقتش غير أسم عيون بس مش عيوني أنا عيون مصر :(
    تحياتي

    ردحذف
  3. مبروووووووووك يا رنا عالمدونه الجديده اسمها جميل اوى وجميله فعلا مبروك ياحبيبتى ويارب عيونك متشوفش غير كل شئ جميل وسعيد

    ردحذف
  4. ألف مبروك يا رنرون على المدونة الجديدة
    ويارب يكون عندك 80 عين مش 8 بس
    وما تشوفيش بيهم غير كل حاجه كويسة
    وويارب يارب تشوفى بيهم الكعبة الشريفة وتملى عينيكى بالنظر لقبر رسول الله صلى الله عليه وسلم

    ردحذف
  5. اهلا بيكى فى عالم التدوين يا رنا

    و مأظنش أنك حتكتبى لنفسك زى مانتى شايفة

    القراء كتير إن شاء الله

    و مستنين إبداعك :)

    ردحذف
  6. محمد حمدي..انا كمان مبسوطة انك اول حد علق في أول بوست في أول مدونة ليا على بلوجر وادعيلي اني أقدر أتواصل مع مدونتي بس(أنا حزينة بسبب الخلاف اللي حصل بينا مؤخرا)

    EGYPT EYES...ميرسي قوي ليك وسواء عءوننا أو عيون بلدنا المهم انها من اهم الاعضاء في الجسد الحي..شكرا لمرورك

    احلامنا الحلوة...ميرسي يا سمسمة يا قمر عقبال ما نقولك مبروك عالبيبي اللي ان شاء الله هيبقى زي القمر

    احمد علام...متعرفش يا علام انا مبسوطة بزيارتك ليا هنا قد ايه وميرسي عالدعوة الجميلة دي وهقول بصوت عالي آمين ويارب يسمع منك ونشوف الكعبة كلنا ونملى عيونا بالنظر لقبر الرسول عليه الصلاة والسلام

    aleron..شكرا لمرورك وأتمنى انهم يبقوا كتير زي ما بتقول بس يارب الكتير دول يقروا حاجة كويسة

    ردحذف

يا ترى عيونك بتقول ايه؟؟؟