الخميس، 16 أغسطس 2007

النكد ورايا ورايا..طب هعمل إيه..؟!ـ





مش عارفة إزاي وسط اللي أنا فيه أفتكرت المدونة وفتحتها كأني هلاقي فيها موضوع جديد كتبته (وأنا نايمة)ـ

بصيت لقيتها زي ما هي مفيهاش جديد ما أنا مبكتبش وأنا نايمة قلت طب أدخل أكتب بوست قريت التعليقات ووقفت قدام تعليق محمد التهامي في البوست اللي فات بيقولي خليكي متفاءلة..لاقيتني بضحك ضحكة مهمومة لأني بقالي كتير قوي ما حسيتش بأي نوع من أنواع الفرحة كل حاجة حواليا بتقولي إوعي تفرحي كل ما أقول خلاص الدنيا بدأت تضحكلي وهبقى واحدة تانية تفرح وتتبسط زي أي حد تحصلي صدمة جديدة..تقريبا مفيش حد قربت منه وما إتصدمتش فيه يمكن زي ما كتير قالولي أنا اللي بحكم على الناس غلط بس أنا مبأذيش حد ومبحاولش أضايق حد عشان كدة مبتوقعش خالص ان اللي قدامي ممكن يجرحني أو يكون جواه من ناحيتي حاجة مش كويسة..أنا عمري ما كرهت حد بالعكس أنا بحب الناس وبحب الدنيا (أو كنت كدة) بس يظهر هما مبيحبونيش صحيح بيبقالي ملحوظات كتير على اللي قدامي بس طالما مبتضرنيش مش بقف عليها..مش عارفة ليه كل ده بيحصلي تقريبا ماليش أصدقاء بالمفهموم الحقيقي للصداقة دايما بتخدع فيهم..حتى أخويا اتخدعت فيه وجزء كبير قوي من قرايبي وناس كنت بحترمها جدا وبحبها طلعت وهم كبير...من المشاكل اللي في شخصيتي إني لما بتصدم بقف..بنكسر ..بوقف حياتي..أنا بطبعي بميل للنكد معرفش ليه بحاول أضحك وأفرفش نفسي عشان محدش يحس باللي جوايا بس مبعرفش للأسف مش بعرف أخبي اللي جوايا وأنا جوايا غير راضية عن حاجات كتير بتحصل حواليا كتير بحس إني جاية الدنيا دي غلط..مكاني مش فيها عشان مبعرفش أتأقلم مع حد مبعرفش أحافظ على مكانتي عند الناس ولا على مكانتهم عندي...مش عارفة انا عايشة ليه ولا ايه فايدة حياتي..بيتهيألي أكتر حاجة بعملها في حياتي هي البكاء ببكي على نفسي وببكي على الزمن وببكي ندم وببكي ألم..تقريبا هفضل كدة حابسة نفسي في أطار النكد عشان ماليش حد أثق فيه لدرجة إني أحكيله كل اللي جوايا بصراحة..أنا حتى مش بثق في نفسي هثق في غيري إزاي؟ طب واحدة زيي مبتلاقيش اللي تثق في انها تفضفضله باللي في قلبها هتعمل ايه ما لازم كل همومي تبان عليا لازم أبقى مش قادرة أرسم إبتسامة صافية على وشي..لازم لو جوايا تفاؤل يتحول لتشاؤم..طب هعمل ايه النكد ورايا ورايا وربنا يستر عليا وعلى النكد مني

هناك تعليقان (2):

  1. اتصالحي مع الحياة
    سامحى الاخرين عشان تعرفي تحسى بطعم الدنيا
    بس برضة اتعلمي من اخطائك

    اسمعى فرحة منير

    سلام

    ردحذف
  2. مساء الخير اول حاجة وكل سنة وانتى طيبة بمناسبة رمضان

    مش عارف اقول اية بس الواحد مش هيعرف طعم الحياة الحقيقي لو عاش طول عمرة بيضحك يعني بداية من الرسل والانبياء حتى عظماء التاريخ ..



    تحياتى
    العَبدالرَحَمَن.

    ردحذف

يا ترى عيونك بتقول ايه؟؟؟