الثلاثاء، 17 يونيو، 2008

لما تهامي عاوز شهرة ..حضرتك عاوز إيه؟؟!!



مش عارفة أبدأ كلامي إزاي بس الواحد ساعات بيصادف حاجات وناس مبيبقاش فاهم الناس دي عايزة إيه بالضبط؟؟
الموضوع اللي صادفني وبجد استفزني لدرجة إني كتبت الموضوع ده هو موضوع مش لطيف وصلني عن موضوع أنا متابعاه من الأول بس تقريبا صاحب الموضوع نفسه (اللي استفزني) مش متابعه, وبصراحة مش فاهمة إزاي الواحد يتكلم عن أي حاجة والسلام ياخد عنوان مع صورة صادفوه ويألف قصة من دماغه يعمل عليها موضوع مالوش أي هدف غير انه يحبط أو يضايق حد أو يبين انه متابع وهو ولا متابع ولا حاجة وممكن كمان يبقى عايز شهرة هو كمان (من نفسه يعني)...
الموضوع اللي هتقروه دلوقت أول جملتين فيه الكاتب بيسخر مننا كمدونين حسب نص كلامه وبعدين رجع تاني وقال إن بين المدونين سلبيات وايجابيا(مذكرش منها حاجة) وده ان دل فميدلش إلا على انه ناقم على المدونين والتدوين..انا حابة أوصله إن المدونات والتدوين عالم شدنا عشان نخرج اللي جوانا ونفيد ونستفيد من بعض ويبقى كيان خاص بينا سواء إشتهر أو لأ ومعتقدش إن أول اللي استخدموا التدوين كانوا بيعرفوا في الغيب عشان يعرفوا إن عالم التدوين هيشتهر ويتعمله (نفخ إعلامي)..وبالنسبة لصاحبة المدونات اللي اتكلم عليها فأنا معرفهاش ومسمعتش عنها كمان بس عايزة أسأله بفرض إني (عندي واسطة ) وإشتغلت في مؤسسة صحفية كبيرة ولا حتى كتبت في جريدة صغيرة هتعين إمتى؟!! وهاخد كارنيه النقابة إمتى وبعد قد إيه بالضبط؟؟؟!! ومش معنى كدة إني مع اللي عملته مايشة الشهاوي (ده لو كانت عملته فعلا)
نيجي بقى للجزأ الأهم في الموضوع...من فترة عالفيس بوك في جروب كتاب محمد التهامي"بني آدم مع وقف التنفيذ"كتبت عضوة في الجروب موضوع قالت فيه إن في رأيها إن محمد التهامي فيه شبه من عمرو دياب وهي اللي عملت الصورة المنشورة واللي فيها صورة لتهامي جنب صورة لعمرو دياب .. لحد دلوقت تهامي مالوش علاقة بالموضوع يعني لا هو قال انه شبه عمرو ولا عمرو مطربه المفضل, طبعا عمرو لا خلاف عليه كمطرب بس باعتباري من أصدقاء تهامي أحب أعرف صاحب الموضوع إن تهامي من عشاق منير يعني لو هيبقى مهووس بفنان فهيكون منير ودي أذواق رغم احترامه واحترامي الكامل لفن وشخص عمرو دياب ..نرجع لموضوعنا والكلام عن البنت اللي شافت أو حست إحساس فكتبته .. طبعا كان لازم محمد يرد عالموضوع لما رد هتقروا رده هنا قال بمعنى الكلمة انه مش شايف نفسه شبه عمرو بس قال ان يمكن بينهم نظرة تمرد مشتركة كل اللي قاله انه بيحلم بجمهور عمرو (اعترافا منه ان عمرو فنان مشهور ومحبوب وليه جمهور عريض)...طبعا من غير كلامي هتفهموا كل ده لما تشوفوا الموضوع(المستفز) وتقروا الموضوع الأصلي ..أما في الموضوع اللي قدامكم هتلاقوا صاحبه كاتب إن تهامي بيوصف نفسه انه شبيه عمرو دياب؟؟!! وقايل كلام على لسان التهامي معرفش جابه منين بالضبط..!! وكاتب ان دي حالة من حالات البحث عن الشهرة!!!طب بذمتكم كدة مين بالضبط اللي بيبحث عن الشهرة؟؟ اللي بيألف كلام عشان يتنشر وخلاص ولا اللي رد بموضوعية..تهامي فعلا بيبحث عن الشهرة بس في مجاله اللي بيحبه وأعتقد ان ده من حقه ..زي ما أنا بحلم بأني أبقى كاتبة مشهورة بس عشان أحقق ده لازم أكون قده يعني مش هألف ولا هتنازل عشان أبقى مشهورة وخلاص لأني عايزة أبقى مشهورة بقيمة أقدمها وتوصل للناس وعشان أعمل ده لازم أتعب وأقرأ وأشتغل...
كلمة أخيرة: حتى لو مكناش العباقرة اللذين لم ينجب الزمان مثلنا فا إحنا عندنا هدف وفكر وقادرين نكون وإن شاء الله هنكون ...






هناك 7 تعليقات:

  1. مفيش اكتر من الناس اللى بتهاجم عشان اصحاب الحق يردوا ويعملوا جو فالكاتب اللى شايف نفسه كاتب بيفهم يعنى يتشهر
    لعبة رخيصة بتتلعب الايام دى اكتر من الكوتشينة والكونكر على النت
    بس انا برضه شايفاه نجاح لتهامى لانه لفت الانظار حواليه وبكل الاشكال من اول ما هاجوا الكتاب لحد ما خلصوا عليه قاموا خدوا الدور اللى بعده على صورته
    والاساليب الرخيصة فى الهجوم لا تنضب

    ردحذف
  2. والله مافاهمه هما عايزين ايه ولا ايه اللى مضايقهم من المدونين دى تانى مرة اشوف فيها صحفى عمال يشتم على المدونين يلا ربنا يهديهم

    ردحذف
  3. في بداية الطريق لازم تحصل حاجات كتيرة

    نقد أو غيره

    إيجابي أو سلبي


    المهم


    حاولوا تكملوا..ومش تستسلموا..طالما بدأتم


    اتعلموا من كل ده


    سواء كان النقد إيجابي أو سلبي

    لسة الطريق في اوله..والإنسان لازم يتعلم أكيد من كل حاجة :)

    بالتوفيق ان شاء الله للكل :)

    ردحذف
  4. عندك حق بجد
    انا قريت كذا موضوع بيتهم المدونين مش عارفه ليه بجد
    هى الناس دى ايه ذنبها يعنى عشان يتعمل فيهم كده
    هو الكام بقى حرام
    الرأى بقى حرام؟؟
    ناس بتلكك بجد

    ردحذف
  5. غريب أمر الكتابة
    كل من أمسك قلما ظنّ أنه كاتب وله كل الحق في الكتابة أو النقد
    بعيدا عما قيل من الطرف الأستاذ / أحمد حجازي
    فالراجل يتضح لنا انه مش متابع اصلا للمدونة او مجموعة بني آدم مع وقف التنفيذ اللي موجودة عالfacebook
    أنا كنت متابع لموضوع العضوة اللي قالت ان فيه شبه بين تهامي ودياب .. وهي اللي قالت فعلا وهي اللي نزلت الصورة
    لو الأخ / أحمد حجازي كان فعلا متابع او مهتم الصا بالموضوع كان لم يقم بنشر الموضوع من الأساس .. طالما مش متأكد من مصادره أو من قراءته
    وبطالبه كما قال حسن حسني في فلم الباشا تلميذ باعدام كافة مصادره
    أستاذ أحمد / حتى تكون صحفيا ده لو انت فعلا عايز تبقى حاجة ابتعد عن النقد لمجرد النقد واطلق العنان لقلمك حتى يتحدث لا لمشاعرك الداخلية او لرغباتك الشخصية التي عادة تقتل الصحفي قبل أن تلده
    في النهاية أود أن أقول لتهامي " إذا قذفوك الناس من الخلف بالحجارة فاعلم أنك في المقدمة "
    و" إذا أتتك مذمة من ناقص .. فذاك دليل أنك كامل "
    وتقبلوا تحياتي

    ردحذف
  6. معلش يا جماعة اعذروه الظاهر كان مطلوب منه مقال على وجهة السرعة !!!فلفف في المدونات ولف في الجروبات على الفيس بوك وهو شكله أول مرة يعقد على يقعد ع الفيس بوك يا جماعة
    ده حتى مقراش المكتوب تحت الصورة
    ولا يعرف ده مين ولاعمل اية!!

    للأسف حتى الصحفيين والنقاد بقوا سطحيين أوي لدرجة تخليكي تشكي في كونهم وصلوا المكان اللي هم فيه بمجهودهم وبكتابتهم

    المهم أحنا كلنا بنحب تهامي وعارفينه
    ولا يهمك يا تهامي
    سيبك منهم كل ده بيثبت أنك أثبت وجودك من اللحظة الأولى

    تحياتي

    ردحذف
  7. رنا ، قرأت نفس المقال عندما نشر و إستفزني جدااااااً رغم أنيي لم أكن أعرف تهامي شخصيا حينها . بس اللي قلته ساعتها في نفسي " وحتى لو كان تهامي بيقول انه شبه عمرو دياب ما هو حر ، الصحفي ماله، طب انا شبه جوليا روبرتس ، حد عنده مانع "

    ردحذف

يا ترى عيونك بتقول ايه؟؟؟