الجمعة، 27 يونيو 2008

"رحلة جنون"

مش عارفة في إيه بالضبط..مش عارفة مالي..إمبارح عملت حاجة مجنونة كل ما افتكرها يا بضحك على هبلي يا بحس بنشوة غريبة..خلصت إمتحانات بقالي مدة ومن يومها مخرجتش إلا من حلوان للعريش ومن ساعة ما وصلت العريش مخرجتش خالص غير تقريبا زرت واحدة صاحبتي وعملت مشوار الصبح..وطول الفترة دي من 5-6 يعتبر مخرجتش ولا حتى أتمشى تحت بيتنا..مش مشكلة أنا مش بحب الخروج قد كدة..المشكلة أو الموضوع إني خرجت إمبارح مع أختي وصاحبتها واخت صحبتها اللي عندها 16 سنة تقريبا (لسة خارجة من سجن الثانوية العامة وتعذيبه) المهم لفينا شوية وواحنا راجعين فكرنا نرجع مشي.. مش مشكلة العريش مش كبيرة يعني ممكن تلفها كلها مشي، واحنا ماشيين إفتكرت هواية غريبة كنت بحبها زمان بس بخاف أعملها مش خوف من حد بس خوف على شكلي ومنظري قدام الناس ..كنت بحب قوي أمشي بضهري يعني عكس المشي العادي..فكرت انفذ هوايتي (اللي كنت بحبها في خيالي من بعيد لبعيد) وفعلا عملتها ومفكرتش في مين هيشوفني ولا في إني مش صغيرة على الحركات دي ولا في أي حاجة وملقيتش غير البنوتة الصغيرة اللي ممكن تنفذ فكرتي المجنونة معايا 16 سنة بقى ومش هتفرق معاها ورغم انها اتكسفت تعمل كدة وقالتلي يابنتي مينفعش الناس ومنظرنا قلتلها طظ ماحدش له حاجة عندنا وفعلا مشينا بضهرنا عادي يعني حاجة نفسي أعملها وعملتها وفعلا محدش له حاجة عندي..أنا مش صغيرة فعلا بس كفاية رزانة إكتشفت ان بقالي 22 سنة رزينة بمشي أحافظ على كل حركة وكل خطوة بعملها عشان منظري في الشارع وعشان محدش يقول عليا عيلة والكلام الخايب اللي بيحفظوهولنا عشان يكبتوا طفولتنا طبعا سمعنا تعليقات من الرايح والجاي بنات وولاد كبار وصغيرين الماشيين واللي راكبين عربيات..عملت مش واخدة بالي أو نفضت لكل حد علق وإستكمالا لرحلة الجنون قلتلها تعالي نكمل جري بقى وفعلا جرينا في الشارع عادي يعني وهيحصل ايه لما اجري في الشارع وبليل..يمكن تكون دي حركات عادية بالنسبة لحد غيري بس أنا مكانش ده عادي عندي كان لازم أحسب وافكر في كل خطوة قبل ما اعملها أحلى ما في الموضوع اني كمان مكنتش لابسة النضارة(وأنا نظري بعافية شويتين) يعني مكنتش شايفة غير طريقي وبس..المهم اني كنت مبسوطة جداً وحاسة بإنطلاق غير عادي كأني طايرة، معرفش ايه خلاني أعمل كدة يمكن عشان بقالي فترة حاسة اني مش مظبطة جوايا حاجات كتير نفسي أخرجها بس مش عارفة إزاي أخرجها..حاجات مينفعش تتكتب..حاجات حاساها جوايا أنا بس..قررت اني كل فترة أعمل حاجة مجنونة..وأبدأ رحلة الجنون :)

هناك 13 تعليقًا:

  1. عارفه
    تحلى حاجه انك تعمل اللى فى نفسك من غير ماتخاف من الناس وكلامهم طالما ان اللى بتعمله دا مش حرام
    اوقات كتير بتعيش فى سجن اسمه منظرك قدام الناس لكن انا ومن موقعى هذا امام شاشه الكمبيوتر بقول
    ططططططظظظظظظ فى الناس:))
    بجد تحياتى لجنانك

    ردحذف
  2. تعرفى يا رنا .... برافوا عليك
    بجد !! اجمل شىء انك تعملى اللى نفسك فيه .... واللى يطلع فى دماغك طالما لا هو عيب ولا حرام ولا هيضر حد .
    بتيجى اوقات بجد الواحد بيكون عاوز يتنفس براحته من غير قيود ولا خنقة ولا ايه اللى يصح وايه اللى مش يصح .
    دنيتنا بقت مليانة بالمشاكل و الهموم , ومش بتسيب لنا فرصة نختلى بنفسنا , ونعمل اللى نفسنا فيه .
    اوقات باحس انى عاوزة انطلق بعيييييييييييييد عن كل الناس , عن العيون , اقعد مع نفسى فى مكان واسع ممتد مع الفراغ او على البحر وقت الشروق و الغروب ....يااااااااااااه منتهى المتعة بجد
    طولت عليك .. اخيرا بقولك اعملى اللى نفسك فيه و متعى نفسك على قد ما تقدرى و عيشى حياتك وسنك .
    ارق تحياتى ليك ..... سلام

    ردحذف
  3. احسن حاجة انك تعملى اللى انتى عاوزه
    طالما سعيدة مش مهم حد
    تانى

    تهامى

    ردحذف
  4. المهم انك تعملى اللى نفسك فية مش مشكلة الناس شايفة اية المهم انتى عايزة اية
    لان هو ده الهدف علشان تخرجى اى شحنة سلبية
    جواكى وعلشان تظبطى دماغك وتاخدى الحكم من نفسك مش من الناس

    ردحذف
  5. اكسر تروس الساقية واشتم وتف

    ردحذف
  6. بجد جميل ان الواحد يعمل اللي نفسه فيه بالطريقة اللي هو شايفها تناسبه
    حتى لو طريقة مجنونة حبتين
    عجبني او يا رنا عدم التفاتك لكل ما يقال من حولك وتابعتِ السير في هذه الرحلة المجنونة
    كويس انك عملتي اللي تتمنيه من زمان وخرجتِ من الرحلة دي وانتي مبسوطة وحاسة احساس كويس أو نشوة انتصار زي ما بنقول :)

    ردحذف
  7. تحيتي لك
    سيدتي تقبلي دعوتي المعطرة هذه بالحضور لمدونتي و حط رحالك هناك لبعض الوقت أتشرف بزيارتك وأتمنى تلبية هذه الدعوة ووضع لمساتك عليها..
    أنتظرك
    http://kanyatklam.blogspot.com/

    ردحذف
  8. blue-wave...
    ميرسي على تعليقك ويارب متكونش آخر زيارة للبلوج
    عامة أنا مقتنعة جدا برايك..طظ في الناس طالما مش بعمل حاجة غلط :)

    د/داليا..ميرسي ليك وياريت تطولي على طول :)
    فعلا الواحد ساعات بيبقى نفسه يكسر القيود اللي حطها لنفسه عشان الناس والمنظر والسن وومعرفش ايه وكل ده ولا ليه لازمة بيخنقنا وخلاص
    مستنياك دايما تنوري البلوج :)

    تهامي...
    عندك حق :)

    صبري...
    والله أديني بحاول أهو :))

    كريم..والله انا معرفش ازاي عملت كدة بس انا لاقيتني مطنسة للكل ومش مهتمة بأي حد بس كنت مبسوطة :)


    كاتب مصري..شكرا ليك ولدعوتك ان شاء الله أزور مدونتك:) وبتمنى متبقاش آخر زيارة ليك عندي



    شكرا ليكم كلكم :))

    ردحذف
  9. كنتي قوليلي وانا اجي امشي على دماغي مش بقفايا بس

    ردحذف
  10. اولا انا معاكى طظ فى الناس لان الانسان مهما عمل مش هيرضى كل الناس
    ثانيا الواحد بيبقى فعلا احيانا محتاج يفضفض عن اللى جواه باى هبل " رقص - غناء - شقلبة - اى هبل يطلع وخلاص "
    لكن مع ذلك ماكونش شاذ وسط الناس - ماديش فرصة لحد ينتقد سلوكى
    هناك مثل قائل امشى عدل يحتار عدوك فيك
    وسيدنا محمد -ص- لما نهى عن القزاع " حلق جزء من الشعر وترك الاخر ، اعتقد ان النهى كان سببه ان ذلك الشخص يكون شاذا عن المألوف
    انا معاكى نعمل اللى نفسنا فيه - طظ فى الناس - لكن اعطى الطريق حقه
    تقبلى مرورى

    ردحذف
  11. إسلام...يلا اتمشي بقفاك وبضهرك وزي ما انت عاوز :))


    we are not terrorists...انا معاك بس انا ما أذيتش الطريق وبعدين دي حركة وحصلت مرة يعني مش حاجة شاذة وهتفضل كتيير..ولا ايه؟؟
    شكرا لمرورك :)

    ردحذف
  12. خالد كلامك صحيح مع احترامى لحرية التصرف..والفتاة عامة ماخوذ عليها كل حركة وتصرف..رنا ..امامك البيت افعلى ما تشائين..تقبلى مرورى رنا..

    ردحذف
  13. بنت سيناء..مع الاسف ان البنت بيؤخذ عليها كل تصرف وكل حركة..وده اللي انا حبيت اكسره في رحلة جنوني:)

    شكرا لمرورك

    ردحذف

يا ترى عيونك بتقول ايه؟؟؟